نئی دہلی(مانیٹرنگ ڈیسک)بھارتی دارالحکومت دہلی میں خود کو امارات کے شاہی خاندان کے عملے کا رکن ظاہر کرنے والا ایم ڈی شریف نامی نوسرباز فائیو سٹار ہوٹل میں چار ماہ شاندار قیام وطعام کے بعد رفو چکر ہو گیا،پولیس نے مقدمہ درج کرتے ہوئے’شریف ‘نامی نوسر باز کی تلاش شروع کردی۔
بھارتی میڈیا کے مطابق ایم ڈی شریف نامی اس نوسر باز نے یکم اگست سے 20 نومبر 2022 تک لیلا پیلس کے کمرہ نمبر 427 میں قیام کیا اور ہوٹل چھوڑتے ہوئے بل کی ادائیگی کے لیے ایسا چیک دے گیا جو بینک میں رقم نہ ہونے کے باعث باونس ہوگیا۔ہوٹل انتظامیہ نے الزام عائد کیا ہے کہ وہ جاتے جاتے قیمتی اشیاء بھی چرا لے گیا۔دہلی پولیس کو ہوٹل انتظامیہ کی جانب سے درج کروائی جانے والی شکایت میں کہا گیا ہے کہ محمد شریف نامی شخص نے اپنا تعارف ابو ظہبی کے شاہی خاندان کے ملازم کے طور پر کروایا تھا اور4 ماہ ہوٹل میں قیام کے بعد 23 لاکھ روپے کا بل ادا کیے بغیر ہی غائب ہوگیا۔پتا لگایا جارہا ہے کہ مبینہ جعلی کارڈز رکھنے والا ایم ڈی شریف نامی پہلے بھی اس قسم کی دھوکہ دہی میں ملوث رہا ہے یا نہیں۔اس شخص کی بھارت اور امارات دونوں جگہوں پرتلاش جاری ہے۔انڈین ایکسپریس کے مطابق پولیس نے فرار ہو جانے والے شخص کیخلاف دھوکہ دہی اور چوری کا مقدمہ درج کر لیا ہے۔ہوٹل انتظامیہ کے مطابق مذکورہ شخص نے شک نہیں ہونے دیا کہ وہ دھوکہ باز ہو سکتا ہے حتیٰ کہ جب 20 نومبر کو وہ ہوٹل چھوڑ کر گیا تو بھی یہی خیال تھا کہ اس کا دیا ہوا چیک 22 نومبر کو کلئیر ہوجائے گا مگر اب ایسا لگتا ہے کہ وہ شروع سے ہی دھوکے بازی میں ملوث تھا۔دہلی پولیس ہوٹل کو دیے جانے والے مبینہ جعلی بزنس کارڈز اور دیگر کوائف کے مطابق سراغ لگانے کی کوشش کر رہی ہے،تفتیش میں بینک کو دیا جانے والا چیک بھی اہم ثابت ہوگا۔ایم ڈی شریف کا دعویٰ تھا کہ وہ شیخ فلاح بن زید کے دفترسے منسلک اور عرب امارات کے بانی کا بیٹا ہے۔
