اسلام آباد(ویب ڈیسک)نیشنل ڈیٹا بیس اینڈ رجسٹریشن اتھارٹی (نادرا) سے شہریوں کا ڈیٹا چوری ہونے کے اسکینڈل کی تحقیقات میں اہم پیشرفت سامنے ائی ہے۔تحقیقاتی کمیٹی (جے ائی ٹی) نے 27 لاکھ پاکستانیوں کا ڈیٹا چوری ہونے کی تصدیق کردی۔
ذرائع کے مطابق ڈیٹا لیک اسکینڈل تحقیقات کے لیے قائم جے ائی ٹی نے اپنا کام مکمل کرلیا ہے۔مشترکہ تحقیقاتی ٹیم کی سربراہی ایف ائی اے کے وقارالدین سید نے کی، جبکہ جے ائی ٹی میں حساس اداروں سمیت نادرا کے نامزد افسران بھی شامل تھے۔
کمیٹی نے تحقیقاتی رپورٹ مکمل کرکے وزارت داخلہ میں جمع کروا دی ہے۔رپورٹ کے مطابق نادرا سے شہریوں کا ڈیٹا 2019 سے 2023 کے دوران چوری کیا گیا، ڈیٹا لیک اسکینڈل میں ملتان، پشاور اور کراچی کے نادرا دفاتر ملوث پائے گئے۔
رپورٹ میں بتایا گیا کہ نادرا کا ڈیٹا ملتان سے پشاور اور پھر دبئی گیا، نادرا ڈیٹا کے ارجنٹائن اور رومانیہ میں فروخت ہونے کے شواہد بھی ملے۔رپورٹ میں نادرا کے متعدد اعلیٰ افسران کے خلاف کارروائی کی سفارش کی گئی ہے۔مارچ 2023 کے سائبر واقعے کی تحقیقات کیلئے جے ائی ٹی بنائی گئی تھی۔ نادرا نے 30 اکتوبر 2023 کو جے ائی ٹی کیلئے حکومت سے درخواست کی تھی۔
