اسلام آباد(سٹاف رپورٹر)سابق وزیر داخلہ شیخ رشید نے کہا ہے کہ سپریم کورٹ کو ہاتھ کی چھڑی نہیں بنایا جاسکتا۔سماجی رابطے کی ویب سائٹ ٹوئٹر پر اپنے جاری کردہ ٹوئٹ پیغام میں سابق وزیر داخلہ شیخ رشید نے لکھا کہ پنجاب کا سیاسی کوڑا کرکٹ گٹر میں پھینکا جائے گا ، نیب کی من پسند ترمیم بھی ختم ہو گی اور اوورسیز کو ووٹ کا حق بھی ملے گا۔
جاری کردہ ٹوئٹ میں شیخ رشید لکھتے ہیں کہ ماڈل ٹاون کے شہیدوں کو انصاف ملے گا، ملکی اثاثے بیچنے سے پہلے ہی انکا کھیل ختم ہو جائے گا اور نہ من پسند قانون سازی ہوگی، نہ نواز شریف آئے گا۔انہوں نے کہا کہ سپریم کورٹ کی خودمختاری کو آئینی تحفظ حاصل ہے، اسکے اختیارات کو بڑھایا جا سکتا ہے گھٹایا نہیں جا سکتا۔
شیخ رشید کا کہنا تھا کہ سپریم کورٹ کو قاتل عدلیہ کہا گیا، سپریم کورٹ کو جیب کی گھڑی ہاتھ کی چھڑی نہیں بنایا جاسکتا اور نہ ہی گورنر راج لگایا جا سکتا ہے۔انہوں نے مزید کہا کہ ڈالر 250 کا اور 7 ارب ڈالر کے ذخائر کم ہو گئے ہیں۔
