اسلام آباد (وقائع نگار خصوصی) نیشنل الیکٹرک پاور ریگولیٹری اتھارٹی (نیپرا) کی جانب سے بجلی کی فی یونٹ قیمت میں اضافے کی منظوری دے دی گئی ہے۔
تفصیلات کے مطابق نیپرا کی جانب سے بجلی کی فی یونٹ قیمت میں9 روپے79 پیسے اضافے کی منظوری دی گئی ہے، بجلی مہنگی کرنے کی منظوری گزشتہ مالی سال کی ماہانہ ایڈجسٹمنٹ کی مد میں دی گئی ہے۔
نیپرا میں سی پی پی اے کی جون کیلئے فیول ایڈجسٹمنٹ کے حوالے سے سماعت ہوئی جس میں نیپرا نے بجلی 9روپے 79پیسے فی یونٹ مہنگی کرنے کی منظوری دیدی،اس حوالے سے نیپرا حکام کے مطابق مذکورہ اضافے کا اطلاق لائف لائن اور کے الیکٹرک صارفین پر نہیں ہوگا یہ اضافہ جون کی ماہانہ فیول ایڈجسٹمنٹ کی مد میں کیاگیا ہے۔
حکام کا کہنا ہے کہ نیپرا اتھارٹی اعداد وشمار کا جائزہ لینے کے بعد تفصیلی فیصلہ جاری کرے گی، صارفین کو آئندہ ماہ کے بلوں میں اضافی ادائیگیاں کرنا ہوں گی۔چیئرمین نیپرا توصیف فاروقی نے کہا کہ بجلی کی پیداوار کیلئے ایل این جی نہ خریدی گئی تو کیا لوڈشیڈنگ ہوگی؟ اور اس سلسلے میں حکومت کیا حکمت عملی اپنائے گی ؟سی پی پی اے حکام نے جواب دیا کہ بجلی کی پیداوار کیلئے کوئلے کی فراہمی میں بہتری آئی ہے، گرڈ کو مستحکم رکھنے کے لیے بھی اقدامات کررہے ہیں۔چیئرمین نیپرا کا کہنا تھا کہ ایندھن کی قیمت میں 10فیصد اور روپے کی قدرآدھی رہ گئی ہے، فیول ایڈجسٹمنٹ کے تحت صارفین پر 133ارب روپے کا اضافی بوجھ پڑے گا۔
