لاہور(سٹاف رپورٹر) سعودی عرب نے پاکستان میں ٹیکنالوجی ہاوس کے قیام کا اعلان کر دیا۔
’پاکستان ٹائم ‘ کے مطابق سعودی جی 20 ینگ انٹر پرینیورز الائنس کے صدر شہزادے فہد بن منصور نے لاہور میں 3 روزہ ٹیک موٹ فیوچر فیسٹ کانفرنس میں ورچوئل خطاب کے دوران پاک سعودی ٹیکنالوجی ہاوس کے قیام کا اعلان کیا۔شہزادے فہد بن منصور نے کہا کہ پاک سعودی ٹیک ہاوس کا ہیڈ کوارٹرز ریاض میں بنایا جائے گا اور اس کی پہلی شاخ لاہور میں کھولی جائے گی۔انہوں نے کہا کہ میرا پاکستان کا سفر 5 سال قبل لاہور میں ایک آئی ٹی کمپنی کے قیام کے امکانات تلاش کرنے کے لیے شروع ہوا تھا جبکہ پاکستان میں ہر شعبے کے حوالے سے وسائل موجود ہیں۔سعودی شہزادے فہد بن منصور نے 100 ملین ڈالر کے 300 منصوبوں کا بھی اعلان کیا جس کے باعث عالمی سطح پر ایک ہزار سے زائد ملازمتیں پیدا ہوں گی۔
