لاہور(سٹاف رپورٹر)استحکام پاکستان پارٹی کے چیئرمین جہانگیر خان ترین کے بھائی عالمگیر ترین کی مبینہ خود کشی پرقومی کرکٹ ٹیم کے سٹار کھلاڑی اور ملتان سلطان کے کپتان محمد رضوان نے بھی پیغام جاری کرتے ہوئے قوم سے مرحوم کے لئے دعاوں کی اپیل کی ہے۔
یہ بھی پڑھیں:عالمگیر ترین کی مبینہ خود کشی؟علی ترین نے ایسی بات کہہ دی کہ جہانگیر ترین بھی تڑپ اٹھیں
”پاکستان ٹائم “ کے مطابق مائیکرو بلاگنگ ویب سائٹ پر ویڈیو پیغام جاری کرتے ہوئے ملتان سلطان کے کپتان محمد رضوان نے کہا کہ سب کو پتہ چلا ہے کہ عالمگیر ترین صاحب اللہ کے پاس چلے گئے ہیں، آج یہ افسوس ناک خبر ملی ہے،وہ نہ صرف ملتان سلطانز کے اونر تھے بلکہ ایسے بہت سے کام تھے جو پاکستان کی اور لوگوں کی خدمت کر رہے تھے،ذاتی طور پر مجھے اس کے بارے میں پتہ ہے۔محمد رضوان نے کہا کہ میں اس بات کا بھی گواہ ہوں کہ آخری بار جب میری ان سے بات ہوئی تو جو ہماری ٹیم حج کیلئے جا رہی تھی،آخری ٹائم پر ہم نے ان سے درخواست کی تھی ساتھ چلنے کی لیکن انہوں نے کہا تھا کہ ابھی تو بہت کم ٹائم ہے،اگلے سال انشاء اللہ آپ لوگوں کے ساتھ رہوں گا۔محمد رضوان نے مداحوں سے اپیل کی کہ وہ عالمگیر ترین کیلئے دعا کریں کہ اللہ ان کی مغفرت اور جنت میں اعلیٰ مقام عطا فرمائے۔
یہ بھی پڑھیں:عالمگیر ترین کا خودکشی سے پہلے لکھا گیا خط سامنے آ گیا
واضح رہے کہ گزشتہ روز جہانگیر ترین کے بھائی عالمگیر ترین اپنے گھر میں مردہ پائے گئے،پولیس اور اہل خانہ نے اسے خودکشی قرار دے دیا ہے،ابتدائی تفتیش کے مطابق عالمگیر ترین نے دائیں کنپٹی پر ایک گولی چلائی،پوسٹ مارٹم کے بعدگذشتہ شب نماز جنازہ کے بعد مقامی قبرستان میں ان کی تدفین کر دی گئی۔پولیس نے لاش کے پاس سے ملنے والی پستول اور تحریری نوٹ فرانزک کے لیے بھجوادیا گیا ہے۔یاد رہے کہ عالمگیر ترین معروف بزنس مین اور پاکستان سپر لیگ(پی ایس ایل) کی ٹیم ملتان سلطانز کے مالک اور منیجنگ ڈائریکٹر تھے۔
یہ بھی پڑھیں:عالمگیر ترین کولاہور میں سپرد خاک کردیا گیا
