اسلام آباد(وقائع نگار)محرم الحرام جاری ہے،پولیس ،سیکیورٹی ادارے اور مذہبی و دینی جماعتیں ماہ محرم میں قیام امن کے لئے اپنے تئیں کوششوں میں مصروف ہیں،ایسے میں اسلامی نظریاتی کونسل بھی میدان میں آ گئی ہے اور ماہ محرم میں قیام امن کے لئے اٹھارہ نکاتی فارمولہ تشکیل دیتے ہوئے آئمہ،خطبا اور ذاکرین کے لئے ہدایات جاری کر دی ہیں۔
یہ بھی پڑھیں:محرم الحرام،ملک بھر میں فوج کی تعیناتی
”پاکستان ٹائم“ کے مطابق چیئرمین ڈاکٹر قبلہ ایاز کی زیر صدارت اسلامی نظریاتی کونسل کا اجلاس ہوا، اجلاس میں ملک کی تمام بڑی مذہبی وسیاسی جماعتوں کے رہنماوں نے شرکت کی۔اجلاس میں محرم الحرام میں مجموعی امن وامان کے قیام، حکومتی اقدامات اورعلماء و مشائخ کی تجاویز پر غور کیا گیا۔اجلاس میں محرم کیلئے 18 نکاتی ضابطہ اخلاق کی منظوری دی گئی جس پر تمام علمائے کرام نے دستخط کیے۔اسلامی نظریاتی کونسل نے 18 نکاتی ضابطہ اخلاق جاری کرتے ہوئے کہا ہے کہ مساجد اورامام بارگاہوں سے نفرت انگیز تقاریر نہیں ہوں گی،اسلام کے نام پر جبر، ریاست کیخلاف مسلح کارروائی اورانتشار بغاوت کے مترادف تصور کی جائے گی۔ضابطہ اخلاق میں سیکیورٹی اداروں اور مسلح افواج کی بھرپور حمایت کرنے کے ساتھ کہا گیا کہ تمام شہری ریاست کے ساتھ وفاداری کاحلف نبھائیں۔اسلام کے نام پر جبر بغاوت سمجھی جائے گی۔ریاست کیخلاف مسلح کارروائی اورانتشار بھی بغاوت ہو گی۔ضابطہ اخلاق میں کہا گیا ہے کہ فرقہ واریت تعصبات پرمبنی تحریکوں سے گریزکیا جائے، ریاست ایسے گروہوں کیخلاف سخت کارروائی کرے گی۔اسلامی نظریاتی کونسل نے سویڈن واقعے کی شدید الفاظ میں مذمت کرتے ہوئے وفاقی حکومت سے معاملے پر سخت ترین اقدامات اٹھانے کا مطالبہ کیا۔
یہ بھی پڑھیں:سویڈن میں قرآن کریم کی بے حرمتی،مولانا فضل الرحمان نے ملک گیر احتجاج کی کال دے دی
