سینٹ جانز (مانیٹرنگ ڈیسک)امریکی کوسٹ گارڈ کا کہنا ہے کہ ٹائٹن آبدوز کے ملبے سے ممکنہ انسانی باقیات برآمد ہوئی ہیں،طبی ماہرین اس حوالے سے ان مبینہ باقیات کا باقاعدہ معائنہ کریں گے۔
غیر ملکی میڈیا کے مطابق کینیڈا کے سینٹ جانز شہر کی بندرگاہ پر ٹائٹن آبدوز کے ملبے کو لایا گیا جس میں آبدوز کا لینڈنگ فریم اور پچھلی جانب موجود خول بھی شامل تھا۔امریکی کوسٹ گارڈ اس وقت ٹائٹن سانحے کے حوالے سے تحقیقات کے پہلے مراحل میں ہے۔ کوسٹ گارڈ کے شعبہ مرین بورڈ آف انویسٹیگیشن (ایم بی آئی) کو ان شواہد کو ایک امریکی بندرگاہ تک پہچانے کی ذمہ داری دی گئی ہے۔ٹائی ٹینک جہاز کے ملبے کو دیکھنے کی کوشش کے دوران ٹائٹن آبدوز لاپتا ہوگئی تھی، حکام کا خیال تھا کہ اس دوران آبدوز سمندری پریشر نہیں جھیل پائی اور دھماکے سے پھٹ گئی، جس میں دو پاکستانی باپ بیٹے سمیت پانچ افراد مارے گئے تھے۔
یہ بھی پڑھیں:آبدوز ٹائٹن کی تباہی،امریکی کوسٹ گارڈ نے وجوہات کے تعین کے لئے تحقیقات کا آغاز کر دیا
یو ایس کوسٹ گارڈ کی جانب سے جاری بیان میں کہا گیا کہ ’امریکہ کے طبی پیشہ ور افراد ممکنہ انسانی باقیات کا باضابطہ تجزیہ کریں گے۔کیپٹن جیسن نیوباور،جو اس سانحے کی تحقیقات کی قیادت کر رہے ہیں،انہوں نے مزید کہا کہ ’میں غیر ملکی سمندر کی گہرائی سے ملنے والے اس اہم ثبوت کو محفوظ کرنے کے لیے مربوط بین الاقوامی اور انٹرایجنسی تعاون کے لیے شکر گزار ہوں،یہ ثبوت متعدد بین الاقوامی دائرہ اختیار کے تفتیش کاروں کو اس سانحے کی وجہ کے بارے میں اہم بصیرت فراہم کرے گا، ابھی بھی ان عوامل کو سمجھنے کے لیے کافی مقدار میں کام کرنا باقی ہے جو ٹائٹن کی تباہی کا باعث بنے۔ حکام نے کہا کہ اگر ملبہ نکالنے کے دوران سمندر کی تہہ میں انسانی باقیات ملتی ہیں تو اس حوالے سے تفتیش کاروں نے تمام احتیاطی تدابیر اختیار کر رکھی ہیں۔
یہ بھی پڑھیں:کشتی ڈوبنے کا ایک اور ہولناک حادثہ،درجنوں تارکین وطن ہلاک
ایریزونا سٹیٹ یونیورسٹی سے تعلق رکھنے والی حیاتیاتی سمندری ماہر پروفیسر سوزان نیور نے اسکائی نیوز کو بتایا کہ سمندر میں گہرے دباو کی وجہ سے ممکنہ طور پر تیزی سے اور مہلک دھماکے کا امکان ہوتا ہے، میں حیران ہوں باقیات موجود ہیں (لیکن) ظاہر ہے کہ جسم اچانک غائب نہیں ہوجاتا۔اٹھارہ جون کو ٹائٹن کے بحری جہاز پولر پرنس سے رابطہ منقطع ہونے کے بعد ایک گھنٹہ اور 45 منٹ کے بعد تلاش اور بچاو آپریشن شروع ہوا۔رابطہ منقطع ہونے کے آٹھ گھنٹے بعد جہاز کے لاپتہ ہونے کی اطلاع ملی لیکن ٹائی ٹینک کے ملبے سے تقریباً 487 میٹر دور ملبے کے ٹکڑے ملنے کے بعد ریسکیو مشن پانچ دن بعد ختم ہو گیا۔جہاز میں تین برطانوی شہری ارب پتی ہمیش ہارڈنگ، پاکستانی تاجر شہزادہ داود اور ان کا 19 سالہ بیٹا سلیمان شامل تھے۔
ٹائی ٹینک کے ماہر پال ہنری نارجیولیٹ اور اوشین گیٹ کے چیف ایگزیکٹو اسٹاکٹن رش جو کہ آبدوز کی مالک بھی تھی، دھماکے میں مارے گئے۔نئی تصاویر میں دکھایا گیا کہ سینٹ جانز،نیو فاونڈ لینڈ میں کینیڈا کے کوسٹ گارڈ جہاز ہورائزن آرکٹک سے دھاتی ملبے کے کئی ٹکڑے اتار رہے ہیں۔ایک تصویر میں مڑے ہوئے دھات کا ایک بڑا سفید ٹکڑا دیکھا جا سکتا ہے جبکہ ایک اور ملبہ کیبلز اور دیگر مکینیکل حصوں سے بھرا ہوا تھا،کرینوں کے ذریعے اٹھائے جانے سے پہلے ملبے کو ترپال کی بڑی چادروں سے ڈھانپ دیا گیا تھا۔
مزید پڑھیں:وہ بڑا ملک جس نے خود کشی کرنے پر پابندی عائد کر دی
