نیوز روم/امجد عثمانی
زندگی اچھل کود نہیں”ٹھہرائو” سے “نکھرتی” ہے۔۔۔۔۔جتنے بھی جتن کر لیں انجام کار “عہد وفا”۔۔۔ہی عہد ساز باب ٹھہرتا اور وفا کے باب لکھے جاتے ہیں۔۔۔۔۔بقول شاعر وفا داری بشرط استواری اصل ایماں ہے۔۔۔۔۔۔آلو مزاج لوگ تو عجب” بے مزاج” لوگ ہوتے ہیں۔۔۔۔”برائے نام”سے لوگ جیسے کسی بھی سبزی میں آلو۔۔۔۔۔۔!!!کچن سٹدی یا باورچی خانے کا مطالعہ بتاتا ہے آلو سب سے زیادہ”ملن سار” سبزی ہے۔۔۔۔۔.گوشت آلو۔۔۔بینگن آلو۔۔۔گوبھی آلو۔۔۔۔مٹر آلو۔۔۔۔۔۔آلو پلائو وغیرہ کی طویل فہرست ہے۔۔۔۔ اور”مچھلی آلو”کا تو شاید کم ہی لوگوں کو علم ہو۔۔۔۔۔۔آلو مزاج لوگوں کے بارے سوچتے سوچتے سوچوں کے جہان ہی کھل گئے۔۔۔۔۔۔۔۔مشرقی شہر شکرگڑھ سے مغرب کی جانب دو کلومیٹر دور “سبز گائوں”بصرہ جالا نقش خیال پر ابھرا۔۔۔۔یہ ہندوستان سے ہجرت کے بعد ہمارے باوقار نانا جناب دین محمد کا مسکن ٹھہرا۔۔۔۔۔۔ہمارے ننھیال اور سسرال کا گائوں۔۔۔۔۔۔۔۔۔۔۔۔سکول اور کالج کے زمانے میں تحصیل پسرور سے ہماری ہجرت گاہ بھی۔۔۔۔زندگی کے سات آٹھ سال ادھر بتائے۔۔۔۔شہر یاراں میں بزرگ دوست جناب عبد الحمید دکاندار دامت برکاتہم یاد آتے ہیں۔۔۔۔پڑھائی سے فراغت ملتی تو ان کے پاس جا بیٹھتے۔۔۔۔کیا ہی دبنگ آدمی ہیں۔۔۔مرد میدان بھی۔۔۔۔۔۔۔ان کے محلے کا “آلو” نام کا بچہ بھی ذہن میں گھوم گیا۔۔۔۔۔۔۔۔۔۔۔۔۔ناجانے لوگ اسے “آلو” کیوں کہتے تھے۔۔۔شاید وہ آلو کی طرح گول مٹول اور گورا چٹا تھا۔۔۔۔۔۔۔۔۔۔۔۔۔ویسے ہمارے معاشرے میں غریب کو کوئی بھی “نام” دے دیں کیا فرق پڑتا ہے۔۔۔۔۔۔؟؟؟لوگ بھی کمال کرتے ہیں اسی گائوں میں ایک صاحب کو “حاجی کھوتا” بھی کہتے تھے۔۔۔۔آپ بھی سوچ رہے ہونگے کہ ایک دکاندار کو” دامت برکاتہم “لکھ دیا کہ یہ اصطلاح تو علمائے کرام کے لیے مختص ہے۔۔۔۔۔۔۔۔۔۔یہ درازی عمر کی دعا ہے کسی کو بھی دی جا سکتی ہے۔۔۔۔۔۔۔۔۔ہاں ایسی اصطلاحات استعمال کرتے وقت احتیاط لازم ہے کہ میں نے ایک ویڈیو کلپ دیکھا کہ کوئی صاحب کسی کو نور اللہ مرقدہ کہہ رہے تھے جبکہ موصوف جن کے لیے دعا کررہے تھے وہ زندہ سلامت تھے۔۔۔۔۔جیسے ہمارے ایک سب ایڈیٹر دوست جو ہر سرخی کے ساتھ “سوالیہ نشان” لگا دیتے تھے۔۔۔۔۔۔پوچھا یہ کیا “سائنس” ہے تو کہنے لگے آپ بھی تو لگاتے ہیں۔۔۔۔۔یہ پہلی مرتبہ لفظ” کتابچہ” پڑھ کر بھی چونک گئے تھے جیسے ہمارے ایک اور ادھیڑ عمر” رفیق کار” نے سابق افغان وزیر خارجہ عبداللہ عبداللہ کے نام کا کیپشن دیکھ کر شور مچادیا کہ بڑی غلطی چلی گئی۔۔۔پوچھا کیا ہوا تو بولے عبداللہ دو مرتبہ لکھا گیا۔۔۔۔۔۔۔۔۔۔۔۔۔۔۔۔عبدالحمید صاحب ادھار کے باب میں خواتین میں مقبول دکاندار تھے۔۔۔۔ہم انہیں کسی خاتون کے ساتھ بیٹھے دیکھ کر کوئی شرارتی جملہ کہتے تو وہ بڑی معصومیت سے وضاحت کرتے پتر میں دل کا برا نہیں۔۔۔بس ذرا “دیکھنے” کا شوق ہے۔۔۔۔۔واقعی وہ سچ کہتے کہ وہ صاحب کردار آدمی ہیں۔۔۔۔۔وہ “پیالے”میں چائے پیتے اور دلیل یہ دیتے کہ پیالی میں تھوڑی چائے آتی ہے۔۔۔مزہ آنے لگتا ہے تو ختم ہو جاتی ہے۔۔۔۔۔وہ “درباری لوگوں”کو ناپسند کرتے اور اپنے ہی انداز میں ان کے لیے “شٹالہ گروپ” اور “جھولی چک”کی اصطلاح استعمال کرتے۔۔۔۔۔۔۔۔۔۔۔۔۔شٹالہ کو برسیم بھی کہتے ہیں جو جانوروں کا چارہ ہے۔۔۔۔۔۔مچھلی آلو کی کہانی بھی بڑی دلچسپ ہے۔۔۔۔۔۔۔۔۔یادش بخیر۔۔۔۔۔ہم دو ہزار تین میں روزنامہ خبریں کی لانچنگ ٹیم کے ساتھ سکھر میں تھے۔۔۔۔۔۔۔جناب اطہر عارف اور لالہ نور خیال بھی ادھر ہی تھے۔۔۔۔۔یہ رمضان المبارک کا مہینہ تھا۔۔۔۔۔میاں مشتاق مرحوم ہمارے رضاکارانہ طور پر “شیف” تھے۔۔۔۔وہ بڑی عقیدت سے ہمارے لیے سحر افطار کا اہتمام کرتے۔۔۔۔۔۔۔۔۔۔ایک دن انہیں نا جانے کیا سوجھی کہ انہوں نے مچھلی میں آلو ڈال دیے اور کہا کہ آج مچھلی آلو بنے ہیں۔۔۔۔ہر کوئی کہتا کہ میں نے پہلی مرتبہ مچلی آلو کھائے ہیں۔۔۔پھر یہ”منفردڈش” موضوع بحث بن گئی۔۔۔۔۔جناب اطہر صاحب نے سب سے زیادہ شوق سے مچھلی آلو کھائے اور مذاق بھی اڑایا۔۔۔۔اطہر صاحب ہمارے ساتھ سحری کرتے اور پھر کیا ہی نیک دل آدمی تھے۔۔۔۔صبح بڑے اہتمام سے ناشتہ۔۔۔۔وہ افطاری کے وقت بھی خشوع و خضوع سے تشریف فرما ہوتے۔۔۔۔۔۔۔۔بات آلو مزاج لوگوں سے کہاں نکل گئی۔۔۔۔!!بادی النظر میں یہ “صف اول” کے لوگ ہوتے ہیں۔۔۔۔۔یہ گھس بیٹھیے”پہلی قطار”میں اس لیے بلند قامت نظر نہیں آتے کہ یہ “قد اور” لوگ ہیں بلکہ ان کا” شملہ” اس لیے اونچا دکھائی دیتا ہے کہ یہ” پیروں کے بل”کھڑے ہوتے ہیں۔۔۔۔یہ”جیسا دیس ویسا بھیس” ذہنیت کے بہروپیے ہوتے ہیں۔۔۔۔۔اپنے آپ کو شاطر سمجھتے۔۔۔۔ڈپلومیٹک اور پولیٹیکل کہلاتے مگر حد درجہ مصنوعی اور کھوکھلے ہوتے ہیں۔۔۔۔۔۔۔۔اختلاف رائے نہیں رکھتے کہ ان کی کوئی رائے ہی نہیں ہوتی۔۔۔۔۔یہ سرتاپا خوشامدی اور جی حضوری ہوتے ہیں۔۔۔۔۔۔۔یہ صرف اچھے وقت کے “حصہ دار”ہوتے ہیں۔۔۔۔یہ برے وقت کے ساتھی نہیں ہوتے۔۔۔۔عروج میں “طلوع” ہونے والے یہ”نو مولودیے” زوال کی کہانی شروع ہوتے ہی “غروب” ہو جاتے ہیں۔۔۔۔۔۔یہ چڑھتے سورج کے پجاری ہوتے ہیں۔۔۔۔۔۔۔اندھیرے میں دو قدم چلیں تو “ڈگمگا”جاتے ہیں۔۔۔۔۔۔۔۔یہ “ماہی آب” ہوتے ہیں۔۔۔۔۔۔۔پانی بغیر ایک لمحہ جینا پڑے تو “تڑپ”جاتے ہیں۔۔۔۔۔۔درویش نے لقمہ دیا کہ مطلب۔۔۔۔ یہ فواد چودھری اور فردوس عاشق اعوان ہوتے ہیں۔۔۔۔۔۔۔۔یہ شیخ رشید اور راجہ ریاض ہوتے ہیں۔۔۔۔عرض کی کہ کوئی بھی ہو۔۔۔کسی کو کیا دوش۔۔۔۔۔آلو مزاج لوگ بہر حال بڑے ہی “بد قسمت” ہوتے ہیں کہ کبھی ان کے در کبھی در بدر ہوتے ہیں۔۔۔۔۔۔۔!!!
