اسلام آباد(سٹاف رپورٹر)پاکستان تحریک انصاف (پی ٹی آئی)کے چیئرمین اور سابق وزیر اعظم عمران خان کی نا اہلی اور گرفتاری پر مسلم لیگ ن کے دفاترمیں مٹھائیاں تقسیم،کارکنوں کے بھنگڑے،ن لیگی وکلا بھی خوشی سے نہال۔
یہ بھی پڑھیں:عمران خان کی نا اہلی اور گرفتاری پر عبد العلیم خان بھی بول پڑے
”پاکستان ٹائم “کے مطابق چیئرمین پی ٹی آئی عمران خان کی نا اہلی اور گرفتاری پر مسلم لیگ ن سمیت مخالف جماعتوں کے کارکنان مٹھائیاں تقسیم کرنے لگے۔عمران خان کی گرفتاری اور نا اہلی کے فیصلے پر ن لیگ کے کارکنان نے سڑکوں اور اور پارٹی دفاتر میں مٹھائیاں تقسیم کرنا شروع کر دیں۔عمران خان کی گرفتاری پر مسلم لیگ ن لاہور کے صدر نے نصیر آباد میں جشن منایا جبکہ لیگی رہنما کی جانب سے کارکنان میں مٹھائیاں بھی تقسیم کی گئیں۔ن لیگ کے علاوہ پشاور میں بھی عوامی نیشنل پارٹی (اے این پی) کے ورکرز نے جگہ جگہ مٹھائیاں بانٹی،جس کی ویڈیوز سوشل میڈیا پر وائرل ہو رہی ہیں۔
واضح رہے کہ اسلام آباد کی مقامی عدالت نے عمران خان کو توشہ خانہ فوجداری کیس میں 5 برس کے لئے نا اہل اور 3 سال قید کی سزا سنائی ہے۔عدالتی فیصلے کے بعد چیئرمین تحریک انصاف کو ان کی لاہور میں رہائشگاہ زمان پارک سے گرفتار کیا گیا جس کے خلاف احتجاج کرنے پر تین کارکنان کو بھی حراست میں لیا جا چکا ہے۔
