کراچی(سپورٹس رپورٹر)پاکستان کرکٹ ٹیم کے عالمی شہرت یافتہ سابق وکٹ کیپر بلے باز راشد لطیف نے کہا ہے کہ آئندہ ٹیسٹ سیریز کیلئے سرفراز احمد کو محمد رضوان کی جگہ ٹیسٹ نائب کپتان مقرر کیا جانا چاہیے تھا۔
”پاکستان ٹائم“ کے مطابق راشد لطیف کا کہنا تھا کہ سرفراز احمد اپنی کارکردگی اور تجربے کی وجہ سے نائب کپتانی کیلئے زیادہ بہتر امیدوار تھے،سرفراز کی واپسی نے بحیثیت کھلاڑی اِن کی صلاحیتوں اور انکے قابل اعتماد ہونے کا ثبوت دیا۔ سرفراز کی پچھلی کارکردگی اِن کی پلیئنگ الیون میں شمولیت کی ضمانت دیتی ہے اور ٹیسٹ نائب کپتان کے طور پر ان کے انتخاب کو مزید جواز فراہم کرتی ہے۔
مزید پڑھیں:کھیل کے میدان میں کامیابی کے جھنڈے گاڑنے کیلئے محمد حارث نے اپنے ارادے ظاہر کر دیئے
سابق کرکٹر نے تجویز پیش کرتے ہوئے کہا کہ سرفراز احمد کی صلاحیت اور نیوزی لینڈ کے خلاف حالیہ سیریز میں ان کی شاندار کارکردگی کو دیکھتے ہوئے رضوان کو نائب کپتان برقرار رکھنے کا فیصلہ جائز نہیں ہے، بابر اعظم کو تمام فارمیٹس میں کپتان ہونا چاہیے لیکن کسی پر بے جا احسانات نہ کریں، اگر کوئی اور ٹیسٹ میں قائدانہ کردار کا مستحق ہے تو وہ سرفراز احمد کے علاوہ کوئی نہیں ہے۔خیال رہے کہ حال ہی میں پاکستان کرکٹ بورڈ (پی سی بی) کی جانب سے سری لنکا کے خلاف کھیلی جانے والی ٹیسٹ سیریز کے سکواڈ کا اعلان کیا گیا ہے۔ سکواڈ کے مطابق بابر اعظم کپتان اور محمد رضوان کو نائب کپتان مقرر کیا گیا ہے۔
