لاہور( سٹاف رپورٹر)الخدمت فاونڈیشن نے ریسکیو 1122 کے زیر اہتمام 12 ویں نیشنل ریسکیو چیلنج کے مقابلہ جات میں’ہائیٹ ریسکیو چیلنج‘میں پہلی پوزیشن حاصل کر لی۔
پاکستان ٹائم کے مطابق 3 روزہ نیشنل ریسکیو چیلنج میں پنجاب،خیبرپختونخوا،سندھ،بلوچستان،گلگت بلتستان،پولیس، این جی اوز اور یونیورسٹیز سے 19 ریسکیو ٹیموں نے حصہ لیا۔اس کے علاوہ اختتامی تقریب میں ترکی، فلسطین،عمان اور سری لنکا سمیت دیگر ممالک کے وفود نے بھی شرکت کی۔الخدمت فاونڈیشن کی 18 رکنی ٹیم نے منیجر الخدمت ڈیزاسٹر مینجمنٹ پروگرام آصف جمال کی سربراہی میں نیشنل ریسکیو چیلنج میں ہائیٹ ریسکیو،ڈیپ ویل ریسکیو، واٹر ریسکیو،سوئمنگ اور ٹراما اینڈ میڈیکل ایمرجنسی میں حصہ لیا۔مقابلہ جات میں سینئر انسٹرکٹرز اور ماہرین نے ٹیموں کے دیے گئے اہداف اور ایمرجنسی رسپانس کے عالمی معیار کے مطابق جانچا۔سیکرٹری ایمرجنسی سروسز پنجاب ڈاکٹر رضوان نصیر نے اس موقع پر الخدمت فاونڈیشن اور دیگر ٹیموں کا شکریہ ادا کیا اور کہا کہ نیشنل ریسکیو چیلنج کا مقصد ملک بھر میں ایمرجنسی سروسز کے درمیان ہنگامی تعاون کو بہتر بنانا اور ایمرجنسی سروسز کے یکساں معیار قائم کرنا ہے۔ریسکیو چیلنج ریسکیورز کی پیشہ ورانہ صلاحیتوں میں مزید اضافہ کرے گا تاکہ صحت مندانہ مقابلے کے ذریعے ہنگامی حالات اور آفات میں درپیش چیلنجز سے نبردآزما ہو سکیں۔
الخدمت فاونڈیشن پاکستان کے نائب صدر سید احسان اللہ وقاص نے کہا کہ ڈیزاسٹر مینجمنٹ پروگرام الخدمت فاونڈیشن کی ایک پہچان ہے۔ پاکستان میں آنے والے کسی بھی ناگہانی آفت اور حادثے میں الخدمت فاونڈیشن کے ریسکیورز اور رضاکار اپنے مصیبت زدہ بہن بھائیوں کی مدد کے لئے ہراول دستہ کی صورت موجود ہوتے ہیں،دنیا بھر میں ہونے والی موسمیاتی تبدیلیوں کے باعث پاکستان بری طرح متاثر ہوا ہے،ایسی صورتحال میں ریسکیورز کے لیے ایسے پروگرامات کا انعقاد وقت کی اہم ضرورت ہے،اس سے ملک کے تمام صوبوں کی ایمرجنسی سروسز کی کوآرڈینیشن اور پیشہ ورانہ صلاحیت میں بھی اضافہ ہو گا۔
