لاہور (سٹاف رپورٹر)پاکستان مسلم لیگ ن کے سینئر رہنما اور سابق وزیر داخلہ رانا ثنا اللہ نے کہا ہے کہ کسی بھی سیاسی جماعت اور لیڈر کو الیکشن سے پہلے اور بعد میں نشانہ نہیں بنانا چاہیے۔
یہ بھی پڑھیں:آشوب چشم کا پھیلاﺅ،سرکاری اور نجی سکولوں میں چھٹیاں
پاکستان ٹائم کے مطابق اپنے ایک بیان میں ن لیگی رہنما رانا ثنا اللہ نے کہا کہ ہم سیاسی جماعتوں کو نشانہ بنانے کے حق میں نہیں ہیں لیکن اگر کوئی جماعت یا لیڈر ملکی دفاع پر چڑھ دوڑے،شہدا کے مجسموں کی بے حرمتی کرے تو کیا اس پر کیس اس لیے نہیں چلنا چاہیے کہ اس نے الیکشن لڑنا ہے؟انہوں نے کہا کہ نواز شریف 21 اکتوبر کو لاہور پہنچیں گے،نواز شریف لاہور پہنچنے کے بعد مینار پاکستان جائیں گے،مینار پاکستان پر جلسہ ہو گا جس سے نواز شریف خطاب کریں گے،ہماری الیکشن مہم کا آغاز مینار پاکستان سے ہو گا۔رانا ثنا اللہ نے کہا کہ نواز شریف کے خلاف جتنے بھی کیسز ہیں وہ جھوٹ پر مبنی ہیں،آج ملک جس حال میں ہے وہ اس سازش کی وجہ سے ہے جو نواز شریف کے خلاف کی گئی، 2018 میں جب 25 جولائی کو الیکشن ہوئے تو نواز شریف کہاں تھے؟نواز شریف کو اقامہ میں نا اہل کیا گیا،سینیٹ میں ہمارے سینیٹرز کو دوہری شہریت کی بنا پر نا اہل قرار دیا گیا،یہ سب کچھ آن ریکارڈ ہے۔
یہ بھی پڑھیں:عمران خان کا اڈیالہ جیل میں طبی معائنہ
