لاہور(کورٹ رپورٹر) ترجمہ قرآن میں میں تحریف اور بلا اجازت اشاعت کے کیس میں عدالت نے نگران وزیر اعظم انوار الحق کاکڑ اور وزیر اعلیٰ پنجاب سید محسن نقوی کو طلب کر لیا۔
یہ بھی پڑھیں : شیخ زید ہسپتال میں ہڑتال کا چوتھا دن ،پرچی کاﺅنٹر ،او پی ڈی بند ،مریض خوار
”پاکستان ٹائم“کے مطابق عدالت میں قرآن پاک کے ترجمے میں تحریف اور قرآن بورڈ کی اجازت کے بغیر چھاپنے کے خلاف درخواست پر سماعت ہوئی،جس میں عدالت نے نگران وزیراعظم انوار الحق کاکڑ اور نگران وزیر اعلی پنجاب محسن نقوی کو آئندہ سماعت پر ذاتی حیثیت میں طلب کر لیا،جسٹس شجاعت علی خان نے سماعت کے دوران ریمارکس دیے کہ یہ کسی ایک کا کیس نہیں بلکہ ہم سب کا کیس ہے۔عدالت نے محمد حسن معاویہ سمیت دیگر کی درخواستوں پر وفاقی حکومت کی جانب سے رپورٹ جمع نہ کروانے پر برہمی کا اظہار کیا اور ریمارکس دیے کہ 8 ماہ سے وفاقی حکومت نے رپورٹ جمع نہیں کروائی،کیا آپ یہاں سیر کرنے آئے ہیں؟ہم ملک بھر کے چیف ایگزیکٹو کو بلا لیتے ہیں۔دوران سماعت وفاقی حکومت کے وکیل نے رپورٹ جمع کرانے کے لیے مہلت طلب کی،جس پر عدالت نے ریمارکس دیے کہ لگتا ہے آپ یہاں سیر کرنے آئے ہیں اور نگران وزیر اعظم کے سامنے معاملہ رکھا ہی نہیں گیا۔عدالت نے ہدایت کی کہ نگران وزیر اعظم خود پیش ہو کر اپنی پوزیشن واضح کریں۔عدالت نے نگران وزیر اعظم اور اٹارنی جنرل کو 16 اکتوبر کو پیش ہونے کا حکم دے دیا۔دوران سماعت ایڈیشنل آئی جی پنجاب شہزادہ سلطان نے بیان دیا کہ ہمارا دائرہ اختیار بہت محدود ہے۔جس پر عدالت نے ریمارکس دیے کہ آپ اپنے دائرہ اختیار پر جتنا عمل کر رہے ہیں سب کو پتا ہے،عدالت نے ڈی پی او چنیوٹ پر بھی سخت برہمی کا اظہار کیا اور ریمارکس دیے کہ آئی جی کو چاہیے کہ ڈی پی او کو کسی کورس پر بھیجیں۔عدالت نے آئندہ سماعت پر نگران وزیر اعلی پنجاب محسن نقوی کو بھی طلب کر لیا،واضح رہے کہ درخواست گزاروں نے قران پاک کے ترجمے میں تحریف اور قران بورڈ کی اجازت کے بغیر چھاپنے اور توہین آمیز مواد سوشل میڈیا سے نہ ہٹانے کے اقدام کو چیلنج کر رکھا ہے۔
