کراچی(کامرس رپورٹر)پاکستان کی معروف کاروباری شخصیت اور اے کے ڈی گروپ کے چیئرمین عقیل کریم ڈھیڈی نے کہا ہے کہ عالمی مالیاتی فنڈ(آئی ایم ایف)سے معاہدے کے بعد سرمایہ کاروں نے فیصلے کو خوش آئند قرار دیا ہے،اسی وجہ سے مارکیٹ میں مثبت رجحان جاری ہے۔
”پاکستان ٹائم“ کے مطابق میڈیا سے گفتگو کرتے ہوئے عقیل کریم ڈھیڈی کا کہنا تھا کہ پاکستان کو آئی ایم ایف کا سٹینڈ بائے لون مل گیا،یہ جو سٹینڈ بائے لون ملا ہے،یہ 9 مہینے کیلئے 3 بلین ڈالر آپ کو دیں گے اور یہ 15 جولائی کو اپروول (منظور) ہو گا،جس کی وجہ سے مارکیٹ میں کافی پازیٹیو امپیکٹ (مثبت رجحان) آیا ہے،یہ توقع تھی کہ مارکیٹ کو بڑھنا چاہئیے اور اسی توقع کے ساتھ مارکیٹ بڑھی ہے۔عقیل کریم ڈھیڈی نے کہا کہ مارکیٹ کافی سستی تھی،پہلے ہی پینک (گھبراہٹ) بہت تھی اور پینک کی وجہ سے پرائس کے لیول کافی نیچے آئے ہوئے تھے،حکومت کو آئی ایم ایف معاہدے کی صورت میں جو کامیابی ملی ہے اسے چھوٹی مارکیٹ کے سرمایہ کاروں نے خوش آمدید کہا ہے، آنے والے دنوں میں آپ مارکیٹ میں مزید بہتری دیکھ سکتے ہیں۔
یہ بھی پڑھیں:سٹاک ایکسچینج میں اضافہ،وزیر اعظم خوشی سے کھل اٹھے
واضح رہے کہ عید کے فوراً بعد کاروبار کے آغاز پر پاکستان سٹاک ایکس چینج میں زبردست تیزی دیکھنے میں آئی، جس کے باعث 100 انڈیکس میں 5.47 فیصد اضافے کے باعث اپر لاک لگ گیا تھا، جو ایک گھنٹے بعد دوبارہ بحال ہوا۔کاروبار کے آغاز پر 100 انڈیکس میں 2279 پوائنٹس اضافہ ہوا اور انڈیکس 43 ہزار 721 پر پہنچ گیا۔ 100 انڈیکس میں اضافے کا سلسلہ مسلسل جاری ہے اور 100 انڈیکس میں 2197 پوائنٹس کا مزید اضافہ ہوا ہے۔
