اسلام آباد(سٹاف رپورٹر)پاکستان اسٹاک ایکسیج میں غیر معمولی اضافے پر وزیر اعظم شہباز شریف خوشی سے کھل اٹھے،قوم کو مبارکباد پیش کرتے ہوئے کہا کہ شدید مایوسیوں کے بعد امید کا نیا سورج طلوع ہو رہا ہے لہٰذا قوم کو مبارک ہو۔
”پاکستان ٹائم“کے مطابق اپنے ایک بیان میں وزیر اعظم شہباز شریف نے کہا کہ درست پالیسیوں کے باعث معاشی بحالی کے آثار نمایاں ہونا شروع ہوئے،نواز شریف نے تعمیر و ترقی کا سفر جہاں چھوڑا وہیں سے پھر آغاز ہو رہا ہے،ملک دوبارہ ترقی ک راستے پر گامزن ہو چکا ہے،شدید مایوسیوں کے بعد امید کا نیا سورج طلوع ہو رہا ہے لہٰذا قوم کو مبارک ہو۔وزیر اعظم کا کہنا تھا کہ سرمایہ کاروں اور کاروباری برادری کا تیزی سے اعتماد بحال ہو رہا ہے،خدا کرے کہ پاکستان کی ترقی کا سفریوں ہی جاری رہے۔
یہ بھی پڑھیں:اسد قیصر کی پارٹی چھوڑنے کی تردید،پرویز خٹک بارے پالیسی بتا دی
دوسری جانب وفاقی وزیر خزانہ سینیٹر اسحاق ڈار نے ایک ٹویٹ میں لکھا کہ الحمدللہ مبارک ہو، پی ایس ایکس 100 انڈیکس میں 2334 پوائنٹ کا اضافہ ہوا ہے، ملک میں مہنگائی کی شرح 29.4 فیصد پر ہے، مئی 2023 میں مہنگائی کی شرح 38 فیصد تھی جب کہ اوپن مارکیٹ میں ڈالر 270 اور 272 پر آگیا ہے۔واضح رہے کہ عید کے فوراً بعد کاروبار کے آغاز پر پاکستان سٹاک ایکس چینج میں زبردست تیزی دیکھنے میں آئی، جس کے باعث 100 انڈیکس میں 5.47 فیصد اضافے کے باعث اپر لاک لگ گیا تھا، جو ایک گھنٹے بعد دوبارہ بحال ہوا۔سٹاک ایکسچینج میں غیر معمولی اضافے کے علاوہ اوپن مارکیٹ میں ڈالر کی قیمت میں 5 روپے کی کمی دیکھنے میں آئی ہے۔
