اسلام آباد (سپورٹس ڈیسک) پاکستان کرکٹ بورڈ نے پی سی بی گورننگ بورڈکے سابق رکن شکیل شیخ کی کروڑوں روپے کی مبینہ کرپشن اور دستاویزی ثبوت کی روشنی میںتاحیات پابندی عائد کردی۔ پاکستان ٹائم کے مطابق پی سی بی کی انکوائری کمیٹی نے شکیل شیخ کیخلاف بے ضابطگیوں اور شکایات پرجواب طلبی کیلئے انہیں متعدد نوٹسز جاری کئے لیکن ان نوٹسز کے باوجود وہ انکوائری کمیٹی میں پیش نہ ہوئے جس کے بعد شکیل شیخ اور اسلام آباد کرکٹ ایسوسی ایشن کے سابق عہددار ناصر اقبال پر تاحیات پابندی عائد کردی گئی ۔ پی سی بی انکوائری کمیٹی نے شکیل شیخ اور ناصر اقبال سے کروڑوں روپوں کی ریکوری کرنے سمیت انکے خلاف قانون کے مطابق کیسز کے اندراج کیلئے قانون نافذ کرنیوالے اداروں کو معاملہ بھیجنے کی بھی سفارش کی ہے۔
