نئی دہلی (فارن ڈیسک ) سابق بھارتی کرکٹر ایم ایس دھونی سے کروڑوں روپے کا مبینہ طورپر فراڈ ہوگیا ہے جس پر انہوں نے اپنے بزنس پاٹنرز کے خلاف مقدمہ درج کرادیا۔ تفصیلات کے مطابق مقدمے میں دھونی نے الزام عائد کیا ہے کہ ان کے بزنس پارٹنرز نے کرکٹ اکیڈمیوں کے قیام کے معاہدے کی پاسداری نہ کرکے ان کے ساتھ تقریبا 16 کروڑ بھارتی روپے کا فراڈ کیا ہے۔ دھونی کے وکیل دیانند سنگھ نے کہا کہ ملزمان نے 2017 میں بھارت اور بیرون ملک کرکٹ اکیڈمیاں قائم کرنے کے لیے دھونی سے رابطہ کیا تھا اور ابتدائی طور پر اس بات پر اتفاق کیا گیا تھا کہ کرکٹر کو پوری فرنچائز فیس ملے گی اور یہ منافع دھونی اور شراکت داروں کے درمیان 70 اور 30 فیصد کی بنیاد پر بانٹا جائے گا لیکن دونوں شراکت داروں نے سابق کرکٹر کے علم میں لائے بغیر کرکٹ اکیڈمیاں بنائیں اور ایم ایس دھونی کو کوئی رقم بھی ادا نہیں کی گئی۔
