لاہور (سپورٹس ڈیسک) دوسرے ٹیسٹ میچ سے قبل پاکستان کرکٹ ٹیم کے فاسٹ بالرشاہین شاہ آفریدی نے ارادے ظاہرکردیئے اور کہا ہے کہ آسٹریلوی ٹیم کو باکسنگ ڈے ٹیسٹ میچ میں شکست دیکر سیریز میں جاندار کم بیک کریں گے، بلاشبہ آسٹریلوی ٹیم کو اس کی سرزمین پر شکست دینا مشکل ضرور ہے مگر ناممکن نہیں ہے۔ دوسرے میچ سے قبل دیئے گئے اپنے ایک انٹرویومیں شاہین آفریدی کا کہنا تھا کہ کینگروز کے خلاف پہلے ٹیسٹ میچ میں شکست پر بہت مایوسی ہوئی ہے تاہم میزبان ٹیم کے خلاف دوسرے ٹیسٹ میں کامیابی کے لئے ٹیم نے بھرپور تیاری کی ہے جس کا فائدہ ٹیم کو میچ میں فتح کی صورت میں ملے گا، ٹیم میں ایسے کھلاڑی موجود ہیں جو کسی بھی وقت میچ کا پانسہ پلٹنے کی صلاحیت رکھتے ہیں۔ ایک سوال کے جواب میں شاہین آفریدی نے کہا کہ وہ مکمل طور پر فٹ ہیں اور میزبان ٹیم کے خلاف تین ٹیسٹ میچوں کی سیریز کے دوسرے میچ میں شرکت کے لئے بے تاب ہیں، سیریز میں جاندار کم بیک کریں گے۔
