لاہور(سپورٹس ڈیسک)آئی سی سی نے بھارت میں شیڈول ورلڈکپ 2023 کیلئے پاکستان کے وارم اپ میچز کے حوالے سے مطالبہ تسلیم کرلیا ہے، پاکستان کے وارم اپ میچز نیوزی لینڈ اور آسٹریلیا کے خلاف 29 ستمبر اور 3 اکتوبر کو حیدرآباد میں ہوں گے
”پاکستان ٹائم”کے مطابق پی سی بی نے آئی سی سی کے سامنے یہ موقف اپنایا تھا کہ ورلڈکپ کے لئے گرین شرٹس کو وارم اپ میچز میں کسی غیر ایشیائی ٹیم کے خلاف کھلایا جائے کیونکہ میگا ایونٹ سے قبل پاکستان ایشیاکپ میں افغانستان، سری لنکا، بھارت اور بنگلہ دیش کے مدمقابل آئے گا۔بورڈ کی جانب سے آئی سی سی کو اس معاملے پر ایک تحریری جواب جمع کروایا گیا تھا۔منگل کو میگا ایونٹ کے شیڈول کا اعلان ہونے کے بعد اس بات کی تصدیق ہوگئی کہ پاکستان کے وارم اپ میچز نیوزی لینڈ اور آسٹریلیا کے خلاف 29 ستمبر اور 3 اکتوبر کو حیدرآباد میں ہوں گے، جس کا مطلب یہ ہے کہ قومی ٹیم میگا ایونٹ سے قبل کسی ایشیائی ٹیم کے مدمقابل نہیں آئے گی۔
