احمد آباد(سپورٹس ڈیسک )ورلڈکپ میں پاک بھارت میچ کے ممکنہ میزبان سٹیڈیم میں بدنظمی نے سوالات اٹھا دیے۔
ممکنہ طور پر احمد آباد کا نریندرا مودی سٹیڈیم رواں سال اکتوبر میں شروع ہونیوالے 50 اوورز فارمیٹ کے ورلڈکپ میں پاک بھارت ہائی وولٹیج مقابلے اور فائنل کا میزبان ہو گا، آئی پی ایل کے اتوار کو شیڈول فائنل سے قبل وہاں ہونے والی بدنظمی نے ٹکٹ حاصل کرنے والوں کو جسمانی اور ذہنی اذیت سے دوچار کیا جس کی وجہ سے مینجمنٹ کو بھی شرمندگی کا سامنا کرنا پڑا۔آن لائن ٹکٹ خریدنے والوں کیلیے بھی شرط رکھی گئی ہے کہ پیپر پرنٹ سٹیڈیم سے حاصل کریں،گذشتہ روز بیک وقت ہزاروں افراد وینیو کے اطراف میں جمع ہوئے،کئی سخت گرمی میں 2 گھنٹے کھڑے رہنے کے باوجود بھی باکس آفس تک نہیں پہنچ پائے،اس دوران بہت سے لوگ بے ہوش بھی ہوگئے۔شائقین کو کنٹرول کرنے کیلیے پولیس نے لاٹھی چارج سے گریز نہیں کیا،بھگدڑ میں چند افراد زخمی ہوکر ہسپتال پہنچ گئے،اس بدنظمی پر مایوس ہو کر بغیر ٹکٹ کے واپس جانے والے شائقین مینجمنٹ سے سخت ناراضگی کا اظہار کرتے رہے۔
