لاہور: (ویب ڈیسک) قومی کرکٹر عماد وسیم بار بار ٹیم سے نظر انداز کئے جانے پر غصے میں آگئے اور پی سی بی کو خبردار کر دیا۔ انہوں نے کہا کہ اگر اب مجھے کسی ٹھوس وجہ کے بغیر قومی ٹیم سے نکالا گیا تو بورڈ کے خلاف قدم اٹھائیں گے۔
انہوں نے ایک انٹرویو میں کہا کہ ‘میں نے کچھ چیزیں سنی ہیں کہ انہوں (کرکٹ بورڈ) نے کہا کہ کنڈیشنز ایسی تھیں کہ عماد کو نہیں کھلا سکتے تھے، اگر کنڈیشنز کا مسئلہ ہوتا تو جنوبی افریقی لیگ مجھے سائن نہ کرتی، یہ لیگ میں سیاسی مسئلے کی وجہ سے نہیں کھیل سکا، باقی بگ بیش بھی مجھے سائن نہ کرتی’۔ عماد وسیم نے مزید کہا ‘میں یہاں بیٹھ کر کچھ بھی بول سکتا ہوں، کسی کو بھی نشانہ بنا سکتا ہوں لیکن مجھ میں اور ان میں پھر کیا فرق رہے گا ؟ پاکستانی عوام سمیت سب کو سب کچھ پتا ہے، مجھے بحث میں نہیں پڑنا، میں نے اپنا معاملہ اللہ تعالیٰ پر چھوڑا تھا کہ اللہ دیکھ رہا ہے’۔ ان کا کہنا تھا کہ ‘میں کہنا چاہوں گا کہ یہ جو سال سوا سال مجھے ناچاہتے ہوئے بھی بتایا نہیں گیا اور ڈراپ کردیا، اب اس طرح نہیں ہوسکے گا کیونکہ اب اس بار میرے ایکشن اہم ہوں گے کیونکہ اب مجھے بغیر کسی وجہ کے باہر نکالا گیا تو میں پروفیشنل طریقے سے یہ معاملات حل کرنے کی کوشش کروں گا اور قدم اٹھاؤں گا’۔
