لاہور: (سٹاف رپورٹر) قومی کرکٹ ٹیم کے چیف سلیکٹر ہارون رشید نے ٹیم کی کارکردگی کو بتہر بنانے کےلئے مشورہ دیا ہے کہ پی سی بی ون ڈے کرکٹ کو بڑھائے، ڈومیسٹک ٹی ٹوئنٹی کے ساتھ پی ایس ایل بھی ہے جب کہ صرف ایک ون ڈے کپ ہوتا ہے، ون ڈے کرکٹ کے حوالے سے ہمیں سوچنے کی ضرورت ہے۔
ہارون رشید نے اپنے ایک بیان میں کہا کہ ہمیں بیک اپ کھلاڑی بنانے میں وقت لگے گا،ہمارے ہاں تو ڈومیسٹک کے کرکٹرز انٹر نیشنل میں آکر سیکھتے ہیں، یہ صورتحال الارمنگ ہے، ریڈ بال اور وائٹ بال کے الگ کھلاڑی ہوں لیکن ہماری بینچ اسٹرنتھ بڑی نہیں ہے، ہمارے پاس 20 سے 24 کھلاڑیوں کا پول ہے جب کہ انگلینڈ ، آسٹریلیا اور انڈیا کے پاس بہت کھلاڑی ہیں۔ چیف سلیکٹر نے بتایا کہ جو کھلاڑی ٹیم کے ساتھ نہیں ہوں گے وہ این سی اے میں ٹریننگ جاری رکھیں گے، اسی لیے ٹی ٹوئنٹی اور ون ڈے اسکواڈز کا ایک ساتھ اعلان کیا ہے۔ انہوں نے مزید کہا کہ ٹی ٹوئنٹی سیریز کی تیاریوں کے ساتھ ون ڈے پلیئرز این سی اے میں ٹریننگ کرتے رہیں گے، ہمارا فرسٹ کلاس سیزن ستمبر میں شروع ہوتا ہے، اس سے قبل کھلاڑیوں کے لیے مواقع پیدا کریں گے۔
