لاہور (مانیٹرنگ ڈیسک )پاکستان کرکٹ ٹیم کے سینئر کھلاڑی شعیب ملک ویسے تو بہترین بلے باز رہے ہیں لیکن اب وہ اداکاری کے شعبے میں بھی قسمت آزمانے کا سوچ رہے ہیں۔
پاکستان ٹائم کے مطابق شعیب ملک نے اپنی اہلیہ اور ٹینس اسٹار ثانیہ مرزا کے ساتھ پروگرام کے دوران اپنے مستقبل کی منصوبہ بندی کے بارے میں بات کرتے ہوئے اداکاری کے سوال پر جواب دیتے ہوئے بتایا کہ میں ابھی نہ حامی بھر سکتا ہوں اور نہ ہی انکار کر سکتا ہوں لیکن اگر مستقبل میں اچھے پروجیکٹ کی پیشکش ہوئی تو میں اس کے بارے میں ضرور سوچوں گا،
آل راونڈر شعیب ملک اس سے قبل ماڈلنگ بھی کرچکے ہیں اور ڈیجیٹل پلیٹ فارم اردو فلکس میں اپنی اہلیہ کے ساتھ پروگرام کی میزبانی بھی کررہے ہیں،ان کے پاکستانی شوبز انڈسٹری میں بھی بہت سے دوست ہیں۔گزشتہ سال شعیب ملک نے ماہرہ خان کی پروڈیوس کردہ ڈرامہ سیریز ’بروان کھلاڑی‘ میں پہلی بار اداکاری کی تھی۔اس کے علاوہ قومی ٹیم کے کپتان بابر اعظم کے بارے میں سابق فاسٹ باولر شعیب اختر کے بیان پر تبصرہ کرتے ہوئے شعیب ملک نے شعیب اختر کی حمایت کردی،انہوں نے کہا کہ میں شعیب بھائی کو کافی عرصے سے جانتا ہوں،وہ دو ٹوک بیان دیتے ہیں لیکن وہ مگر دل کے بڑے صاف ہیں،کبھی کسی کو تکلیف نہیں دے سکتے۔میرے خیال میں ان کے بیان کو غلط طریقے سے لیا گیا ہے،کسی کے بارے میں رائے قائم کرنے کے لیے انگریزی کو معیار نہیں بنانا چاہیے۔
