لاہور (شوبز ڈیسک) معروف گلوکار شیراز اپل نے زخمی حالت میں ’توکجامن کجا‘ کلام کی وجہ سے ریاض الجنہ پہنچنے کا واقعہ سنادیا ۔ حال ہی میں دیئے گئے اپنے ایک انٹرویو میں بتایاکہ میں 2017 اور 2019 میں دو مرتبہ عمرے کے لیے گیا تھا اور دونوں بار ہی ایسا ہوا کہ میری طبیعت کچھ ٹھیک نہیں تھی، ایک بار تو میرے پاﺅں میں چوٹ بھی لگی ہوئی تھی،میں دعا مانگ رہا تھا کہ اے اللہ مجھے ریاض الجنہ تک پہنچنے میں میری مدد فرما تو میرے یہ دعا مانگتے ہوئے ہی وہاں کے ایک خادم میرے پاس آئے۔ انہوں نے مجھے پہچان لیا اور کہا کہ آپ وہی ہیں نے جنہوں نے تو کجا من کجا کلام پڑھا تھا؟انہوں نے کہا کہ میں نے خادم کو جواب دیا کہ جی میں وہی ہوں تو وہ مجھے ریاض الجنہ میں لے گئے۔ شیراز اپل نے کہا کہ مدینہ منورہ میں میرے ساتھ ایسا دونوں مرتبہ ہوا تو اس لیے مجھے کبھی کبھی لگتا ہے کہ میرا یہ تو کجا من کجا کلام پڑھنا اللہ تعالی نے قبول کر لیا ہے۔
