لاہور (جنرل رپورٹر ) وزیراعلی پنجاب مریم نواز اچانک گورنمنٹ پائلٹ سکینڈری گرلز سکول پہنچ گئیں جہاں وہ طالبات میں گھل مل گئیں، انہیں اپنے درمیان دیکھ کر طالبات بھی حیران پریشان رہ گئیں۔ تفصیلات کے مطابق مریم نواز خاموشی سے جا کر کلاس کی طالبات کے ساتھ بیٹھ گئیں، اس وقت آٹھویں کلاس میں اردو کا ٹیسٹ ہو رہا تھا، وزیر اعلی نے خالی ریپرز دیکھ کر بچیوں کو کلاس روم صاف رکھنے کی ترغیب دی اور کلاس ٹیچر کو ٹیسٹ اور تدریس کا عمل جاری رکھنے کو کہا، طالبہ کی طرف سے درست جواب دینے پر مریم نواز نے سراہا اور پیار کیا۔ انہوں نے بچیوں سے سکول میں درپیش مسائل اور ضروریات کے بارے میں بھی دریافت کیا، بچیوں نے لائبریری اور لیب میں بہتری لانے کے لئے کہا، بچیوں نے سکول میں تقریبات کرانے کی بھی فرمائش کی، مریم نواز نے بورڈ میں پوزیشن لینے والی کھلاڑی طالبات کے ساتھ فوٹو بنوائی اور انہیں آٹو گراف دیا۔ وزیراعلی پنجاب نے سکول سٹاف کے کہنے پر گروپ فوٹو بنوایا اور سکول کی مہمانوں کی کتاب میں اپنے تاثرات درج کیے اور ہونہار طالبات سے ملاقات اور بات چیت کو خوش کن قرار دیا۔
