لاہور(نامہ نگار) اقتدار کی مسند تک پہنچنے کے بعد مسلم لیگ ن نے مفت بجلی دینے کے اعلان پر یوٹرن لے لیااور لیگی رہنماعظمی بخاری کاکہناہے کہ آئی ایم ایف کی شرائط دیکھ کر مفت بجلی دینے کا فیصلہ کریں گے۔ پاکستان ٹائم کے مطابق انہوں نے کہا کہ پاکستان کے لیے بڑا اعزاز ہے کہ مریم نواز پاکستان کی پہلی خاتون وزیراعلی بننے جارہی ہیں، چیلنجز بالکل ہیں لیکن مریم نواز کو نواز شریف کی سرپرستی حاصل ہے، سیاسی کارکن ہر وقت سیکھ رہا ہوتا ہے۔ عظمی بخاری کا کہنا تھا کہ بیورو کریسی کے ذریعے حکومت چلانے کا تاثر غلط ہے، مریم نواز اپنے لیے جس کابینہ کا انتخاب کررہی ہیں وہ نوجوان اور تجربہ کار لوگوں کا مجموعہ ہوگی جبکہ مریم اورنگزیب اور دیگر خواتین مریم نواز کی معاونت کریں گی، آئی ایم ایف پروگرام کی کیا شرائط ہوتی ہیں، اس کے بعد مفت بجلی دینے کا فیصلہ کریں گے۔
