کراچی (نمائندہ خصوصی) شہر قائد میں صنعت کاروں کو سکیورٹی خطرات کے باعث ایڈوائزری جاری کردی گئی جس میں ہدایت کی گئی ہے کہ صنعت کار سفر کے روٹس، اوقات اور گاڑی تبدیل کرتے رہیں، بھتے کی کال یا پرچی آنے پر سائٹ ایریا کرائم مانیٹرنگ سیل کو فوری آگاہ کریں۔ سکیورٹی ایڈوائزری کراچی کے سب سے بڑی صنعتی علاقے سائٹ ایریا کے کرائم مانیٹرنگ سیل کی جانب سے جاری کی گئی ہے جس میں شہر کے حالات کے پیش نظر کسی بھی غیرمتوقع حادثے سے بچنے کے لیے احتیاطی اقدامات کرنے کی ہدایت کی گئی ہے۔یہ بھی کہاگیا ہے کہ فیکٹریوں اور کارخانوں کے باہر خفیہ کیمرے اور سرچ لائٹس لازمی لگائیں، اسی طرح ٹریفک جام اور سگنلز پر گاڑی رکنے پر بہت زیادہ ہوشیار رہیں۔
