لاہور (سٹاف رپورٹر ) گورنر پنجاب محمد بلیغ الرحمن نے جاپان سے اپنی ٹریول ایڈوائزی پر نظر ثانی کا مطالبہ کرتے ہوئے کہا کہ پاکستان سیاحتی اعتبار سے پرامن ملک ہے، ملاقات میں جاپانی سفیر نے کہا کہ عوامی سطح پر رابطے بڑھانے کیلئے تعلیمی اور تجارتی وفود کے تبادلوں کی ضرورت ہے۔ گورنر پنجاب محمد بلیغ الرحمن سے پاکستان میں تعینات جاپان کے سفیر نے ملاقات کی جس میں تجارت، سیاحت اور تعلیم کے شعبوں میں دو طرفہ تعاون کو بڑھانے پر تبادلہ خیال کیا گیا۔ اس موقع پر گورنر پنجاب نے کہا کہ پاکستانی ٹیکسٹائل انڈسٹری میں اسپننگ ملز جاپانی ٹیکنالوجی استعمال کر رہی ہیں، جاپان میں مقیم پاکستانی اس کی معیشت کی ترقی میں مثبت کردار ادا کر رہے ہیں۔ بلیغ الرحمن کا کہنا تھا کہ جاپانی آٹو موبائلز کی اچھے معیار کی وجہ سے پاکستان میں مانگ ہے، پاکستان اور جاپان کے درمیان تجارت کا حجم بڑھانے کی ضرورت ہے،تعلیمی شعبے میں دونوں ممالک کے طلبہ کے وفود کے تبادلے ہونے چاہئیں، جاپان سے طلبہ یہاں آ کر یونیورسٹیوں میں تعلیم حاصل کریں۔
یہ بھی پڑھیں:سابق وزیراطلاعات محمد علی درانی نے عمران خان کی خواہش قوم کے سامنے رکھ دی
