لاہور(کرائم رپورٹر)لاہور مشہور اور معروف لیڈی ولنگڈن ہسپتال کے ڈاکٹرز ہاسٹل کے کمرے سے لیڈی ڈاکٹر کی لاش برآمد ہوئی ہے۔
”پاکستان ٹائم“ کے مطابق لاہور کے لیڈی ولنگڈن ہسپتال کے ڈاکٹرز ہاسٹل میں لیڈی ڈاکٹر کی پر اسرار موت واقع ہوئی ہے،جو اپنے کمرے میں موجود تھیں اور صبح مردہ حالت میں پائی گئیں۔پولیس حکام نے بتایا کہ ڈاکٹر نسیم لیڈی ولنگڈن ہسپتال کے یونٹ ون کی پی جی آر ڈاکٹر تھی اور وہ صبح اپنے کمرے میں مردہ پائی گئیں۔پولیس کے مطابق واقعے کی اطلاع ملتے ہی پولیس پہنچ گئی اور لیڈی ڈاکٹر کی ڈیڈ باڈی پوسٹ مارٹم کے لیے میو ہسپتال منتقل کردی گئی،جبکہ موقع سے شواہد اکٹھے کرکے معاملے کی تفتیش شروع کردی گئی ہے۔
دوسری جانب لاہور کے علاقے نواں کوٹ میں واقع ایک گھرکے واش روم سے خاتون کی پھندا لگی لاش برآمد ہوئی ہے۔ واقعہ کی اطلاع ملتے ہی پولیس اور ریسکیو کی ٹیم جائے وقوعہ پر پہنچ گئیں، جہاں ایک گھر کے واش روم سے 36 سالہ خاتون کی لاش ملی، جس کی شناخت ثانیہ کے نام سے ہوئی ہے۔
پولیس کے مطابق لاش مردہ خانہ منتقل کردی گئی ہے اور جائے وقوعہ سے شواہد جمع کرکے تفتیش شروع کر دی گئی ہے۔
