لاہور، اسلا م آباد، کراچی پشاور(سٹاف رپورٹر) ملک بھر میں گزشتہ رات شب معراج کا مذہبی عقیدت و احترام کے ساتھ اہتمام کیا گیا ، مساجد اور گھروں پر خصوصی محافل کا انعقاد کیا گیا جس میں رب العالمین سے رحمت اللعالمین ﷺ کی ملاقات کے واقعہ معراج کی فضیلت بیان کی گئی ۔
تفصیلات کے مطابق ملک بھر میں شب معراج ہفتہ 18 فروری کی رات کو مذہبی عقیدت اور احترام سے منائی گئی، شب معراج کے موقع پر مساجد پر چراغاں کیا گیا، پوری رات مساجد میں درود وسلام کی صدائیں گونجتی رہیں، لاکھوں فرزندان اسلام نے شب بیداری کی، نوافل ادا کئے اور روزے کا بھی اہتمام کیا گیا۔
محافل میں علمائے کرام، مشائخ عظام اور مفتیان کرام نے شب معراج کے حوالے سے اپنے خصوصی خطاب میں اس رات کی فضیلت بیان کی، واقعہ معراج کا تفصیلی ذکر کیا اور نبی آخرالزماںﷺ کی حیات طیبہ کو اجاگر کیا۔
ستائیس رجب کی شب حضرت محمد صلی اللہ علیہ و آلہ وسلم کو معراج کا شرف عطاءکیا گیا، جب حضرت جبرائیل براق لے کر نبی آخرالزماںﷺکی خدمت میں حاضر ہوئے اور عرض کی اے اللہ کے رسولﷺ، آپ کا رب آپ سے ملاقات چاہتا ہے، حضور اکرم صلی اللہ علیہ واالہ وسلم براق پر سوار ہوئے اور اپنے رب سے ملاقات کیلئے چل دیئے۔
اس مقدس سفر کے دوران آپ ﷺمکہ سے مسجد اقصیٰ گئے اور وہاں تمام انبیائے کرام کی نماز کی امامت فرمائی، پھر آپ کو آسمانوں میں اللہ تعالیٰ سے ملاقات کرانے کے لئے لے جایا گیا، وہاں رسول اکرمﷺکو جنت اور دوزخ بھی دکھائی گئیں۔ آپ ﷺکی ملاقات مختلف انبیائے کرام سے بھی کرائی گئی، اسی سفر میں نماز بھی فرض ہوئی۔
