بارانکویلا (فارن ڈیسک) کولمبیا سے تعلق رکھنے والی ایک خاتون نے اپنے کئی ساتھیوں کے ساتھ مل کر دوسالہ بیٹے کو اغوا کروایا تاکہ شوہر سے اس کا تاوان وصول کرسکے ۔ غیر ملکی میڈیا کے مطابق ایک ہفتہ قبل خبر پھیلائی گئی کہ دو سالہ بچے کو ماں کی گود سے اس وقت چھین لیا گیا جب وہ اسے لے کر چہل قدمی کے لیے نکلی تھی، پولیس کے جائے وقوعہ پر پہنچنے کے بعد خاتون سے تفتیش کی گئی اور بچے کو ڈھونڈنے میں زیادہ وقت نہ لگا کیونکہ پولیس کو کسی نے اطلاع دی کہ دو سالہ بچہ اغوا کے بعد ایک اپارٹمنٹ میں رکھا گیا ہے، جب پولیس اس جگہ پہنچی تو ناصرف کچھ لوگ بچے کے ساتھ موجود تھے بلکہ بچے کی ماں کا بہت اچھا دوست بھی بچے کی دیکھ بھال کررہا تھا جس کی نشاندہی بچے کے والد نے کی۔ نوجوان سے تفتیش کی گئی تو پتا چلا کہ نوزائیدہ کی ماں نے ہی اسے کچھ دن تک اس کی دیکھ بھال کرنے کا کہا تھا تاکہ وہ اپنے شوہر سے 14 ہزار 700 ڈالرز لے سکے۔
