نئی دہلی(مانیٹرنگ ڈیسک) بھارت نے 2 ہزار 143 پسماندہ جوڑوں کی اجتماعی شادی کرکے ایک دن میں سب سے زیادہ شادیوں کا گنیز بک آف ورلڈ ریکارڈ قائم کر دیا۔
غیر ملکی خبر رساں ایجنسی کے مطابق بھارتی ریاست راجستھان کے ضلع باران میں سب سے زیادہ جوڑوں کی اجتماعی شادیوں کی تقریب ہوئی۔ جس میں 2 ہزار 143 پسماندہ جوڑوں کی شادی کرائی گئی۔
مقامی ٹرسٹ کی جانب سے تمام شادیوں کا اہتمام کیا گیا جس میں مسلمان اور ہندو جوڑے شامل تھے۔ بھارت میں ہونے والی اجتماعی شادی کی تقریب نے ایک دن میں سب سے زیادہ شادیوں کا گنیز بک آف ورلڈ ریکارڈ قائم کر دیا۔ اجتماعی شادی کی تقریب تقریباً 6 گھنٹے جاری رہی، جس میں راجستھان کے وزیر اعلیٰ اشوک گہلوت سمیت کئی عہدیداروں نے شرکت کی اور شادی کے بندھن میں بندھنے والوں کے لیے نیک خواہشات کا اظہار کیا۔ مقامی ٹرسٹ کی جانب سے ہر نوبیاہتا جوڑے کو زیورات، برتن، ٹیلی ویڑن، ریفریجریٹر سمیت کئی تحائف دیئے گئے۔
