ناروال ( سٹاف رپورٹر)وزیراعلیٰ پنجاب مریم نواز شریف نے کہا ہے کہ ملک بھر سے اچھی جبکہ اڈیالہ جیل سے بری خبریں اور خط پر خط آ رہے ہیں،منتیں ہو رہی ہیں کہ اللہ کے واسطے مجھے بچالو،ملک ترقی کی راہ پر گامزن ہو گیا، میں اپنی ایک سال کی کارکردگی لے کر آپ کے سامنے پیش ہوئی ہوں۔
”پاکستان ٹائم“کے مطابق نارروال میں جلسے سے خطاب کرتے ہوئے وزیر اعلیٰ پنجاب مریم نواز شریف نے کہا کہ وزیر اعلیٰ بننے کے بعد میرا پہلا اجتماع نارووال میں ہے،ایک سال کی کارکردگی کے ساتھ آپ کے سامنے موجود ہوں،نواز شریف کی قیادت میں ملک کو مشکلات سے نکال دیا ہے،ہم دن رات محنت کر کے عوام کی زندگیوں کو تبدیل کر کے رہیں گے، جس نواز شریف کو مارنے اور گرانے کی کوشش کی گئی،آج وفاق میں اس کا بھائی اور پنجاب میں اس کی بیٹی کی حکومت ہے،مسلم لیگ ن کی حکومت عوام کی خدمت کر رہی ہے،بتایا جائے کہاں ہے وہ پاکستان جس کے ڈیفالٹ کی باتیں کی جارہی تھیں؟آج پاکستان کی معیشت ٹیک آف کر رہی ہے،عوام گواہی دے رہے ہیں کہ نواز شریف نے پاکستان کو مشکلات سے نکال دیا۔
وزیر اعلیٰ پنجاب مریم نواز شریف کا کہنا تھا کہ عمران خان کے دور حکومت میں سٹاک مارکیٹ کریش کر گئی تھی، سٹاک مارکیٹ آج بلندیوں پر ہے جبکہ دہشت گردی ملک میں دوبارہ آ گئی تھی لیکن آج سب کچھ اس کے بر عکس ہے اور مہنگائی 38 سے 6 فیصد پر آگئی ہے،پی ٹی آئی کے دور میں پنجاب سے ایک ہی خبر آتی تھی کہ گوگی یہ کھا گئی اور پنکی وہ کھا گئی،پہلے سفارش اور رشوت کے بغیر پنجاب میں کوئی کام نہیں ہوتا تھا،میں نے ایک سال میں پنجاب میں دن رات ایک کر کے کام کیا،آج صوبے کو صاف ستھرا کیا جا رہا ہے جبکہ روٹی 25 روپے سے 12 سے 13 روپے پر آ گئی ہے، 2 سال پہلے پورے پاکستان سے بری خبریں آ رہی تھیں،آج ملک بھر سے اچھی خبریں آ رہی ہیں،صرف اڈیالہ جیل سے بری خبریں آ رہی ہیں،اڈیالہ سے صرف خط پر خط آ رہے ہیں،اڈیالہ والے منتیں کر رہے ہیں کہ ہمیں بچا لو۔
وزیر اعلیٰ پنجاب نے کہا کہ پنجاب حکومت غریبوں کو گھر بنانے کے لیے قرضہ دے رہی ہے جبکہ کسانوں کو کسان کارڈ دیے گئے ہیں،اس کے علاوہ معذور افراد کو ہمت کارڈ فراہم کیے گئے ہیں،یوتھ کا نعرہ لگانے والوں نے نوجوانوں کو کیا دیا؟ ہم سکالر شپس کو بڑھا کر 50 ہزار تک لے کر جا رہے ہیں،جلد ایک لاکھ لیپ ٹاپس بھی تقسیم کیے جائیں گے،اس کے علاوہ مستحق افراد کو گھروں کی تعمیر کے لیے قرضہ دیا جا رہا ہے جبکہ صوبے میں صحت کی بنیادی سہولیات بھی فراہم کی جا رہی ہیں۔
