بلاول بھٹو نے کراچی کے تاجروں کو کھری کھری سنا دیں،واضح پیغام دے دیا

کراچی(بیورو رپورٹ)پاکستان پیپلز پارٹی کے چیئرمین بلاول بھٹو زرداری نے کراچی کے تاجروں اور اپنی حلیف جماعت مسلم لیگ ن کو واضح اور دوٹوک پیغام دیتے ہوئے کہا ہے کہ کسی کو وزیر اعلیٰ یا کسی وزیر یا بیورو کریسی سے شکایت ہے تو مجھ سے کرے،یہ صوبہ پیپلز پارٹی کا ہے،کہیں اور جا کر چغلی کرنے کی ضرورت نہیں،ہم تاجروں کے ساتھ مل کر مسائل کا حل نکالیں گے۔
”پاکستان ٹائم“کے مطابق خیال رہے کہ چیئرمین پیپلز پارٹی بلاول بھٹو زرداری نے تاجروں کو آج ظہرانے پر مدعو کرتے ہوئے تقریب کا انعقاد کیا جس میں انہوں نے تاجربرادری سے بات چیت کی اور ان کے مسائل سنے۔تقریب سے خطاب کرتے ہوئے بلاول بھٹو زرداری نے کہا کہ اگر کسی بیوروکریٹ یا وزیر اعلیٰ سے کوئی شکایت ہو تو مجھے بتائیں،کسی اور جگہ چغلی کرنے کی ضرورت نہیں ہے،سندھ میں ذمہ دار پیپلز پارٹی ہے اور ہمیں مسائل کے حل کے لیے آگاہ کریں۔بلاول بھٹو زرداری نے سندھ میں امن و امان کی صورتحال کو پیپلز پارٹی کی بدولت قرار دیتے ہوئے کہا کہ آج آپ سے بھتہ نہیں مانگا جا رہا،صنعتوں کو بند کر کے مزدوروں کو سیاسی جلسوں میں نہیں لے جایا جا رہا اور آپ کی زندگی کو کوئی خطرہ نہیں،تاجر برادری کے مسائل بہت پہلے حل ہو جانے چاہیے تھے،کراچی اور ملک کی ترقی میں تاجر برادری کا اہم کردار ہے،کیا میں نے کبھی آپ کو تنگ کیا؟میں کیوں چاہوں گا کہ میرے یا میری حکومت کے نام پر تاجروں کو تنگ کیا جائے؟ماضی میں کراچی کا چلن اب تاریخ کا حصہ بن چکا ہے اور اب ہوائی باتیں ختم ہونی چاہئیں، 15 سال سے میری حکومت ہے،کیا میں نے آپ کو تنگ کیا؟سندھ میں پیپلز پارٹی کی حکومت ہے اور وزیر اعلیٰ آپ کی بات سنیں گے۔

یاد رہے کہ چند روز قبل وفاقی وزیر برائے منصوبہ بندی احسن اقبال کی کراچی میں تاجروں سے ملاقات کے دوران تاجر رہنما عتیق میر نے ان سے کہا تھا کچھ عرصے کے لیے مریم نواز ہمیں دے دیں اور مراد علی شاہ آپ رکھ لیں۔عتیق میر کے اس بیان پر سندھ حکومت کی ترجمان سعدیہ جاوید نے سخت ردعمل دیتے ہوئے کہا تھا کہ کسی خوشامدی سے رٹا لگوائی ہوئی بات کہلوانے سے زمینی حقائق تبدیل نہیں کیے جا سکتے،مراد علی شاہ منتخب وزیر اعلیٰ ہیں اور متعلقہ تاجر نے عوام کے مینڈیٹ کی توہین کی ہے،ایک تاجر کا خوشامدی بیان پوری تاجر برادری کی سوچ کی عکاسی نہیں کرتا،وزیر اعلیٰ سندھ کی کارکردگی پیپلز پارٹی کے منشور کا حصہ ہے،کسی ایک بیان سے حقائق نہیں بدل سکتے۔

اس خبر پر اپنی رائے کا اظہار کریں

اپنا تبصرہ بھیجیں