لاہور(وقائع نگار خصوصی) ایکسل لوڈ کنٹرول رجیم پر 100فیصد عملدرآمد کے اہداف کو یقینی بنایا جائے گا۔آئی جی سلمان چودھری نے ایکسل لوڈ کنٹرول رجیم سے متعلق سخت ہدایات جاری کردیں۔ آئی جی سلمان چودھری کی ہدایات پر ڈی آئی جی شاہد جاوید نے فوری عملدرآمد شروع کر دیا۔ ڈی آئی جی شاہد جاوید نے سینٹرل زون کے تمام سیکٹرز اور بیڑ کمانڈرز کو ہدایات دیتے ہوئے کہا ہے کہ اوور لوڈڈ گاڑیوں کو ہرگز ہائی ویز پر داخلے کی اجازت نہیں ہو گی۔ آئندہ قومی شاہراؤں پر اوولوڈڈ گاڑیاں نظر نہیں آنی چاہیے۔ سیکٹر اور بیٹ کمانڈرز سرپرائز چیکنگ اور مانیٹرنگ میں کوئی کوتاہی نہ برتیں۔ ڈی آئی جی شاہد جاوید نے مزید کہا کہ کہ بھاری جرمانوں کے علاوہ اوولوڈ نگ کرنے والے ٹرانسپورٹرز کے خلاف سخت قانونی کارروائی بھی عمل لائی جائے۔ قیمتی شاہراؤں کو تباہی سے بچانے کیلئے کسی سے کوئی رعایت نہیں برتی جائے ۔ ہم نے ہر حال میں قیمتی شاہراؤں اور انسانی زندگیوں کو بچانا ہے۔ آئی جی موٹروے پولیس سلمان چودھری نے ایکسل لوڈ رجیم کنٹرول پر عملدرآمد یقینی بنانے کے لیے ایڈیشنل انسپکٹرز جنرل کی سر براہی میں سپیشل سکواڈ تشکیل دے دیا ہے ۔ قومی شاہراؤں سے اوورلوڈنگ کے مکمل خاتمے کیلئے پرعزم ہیں۔ شاہراہیں کسی بھی ملک کی اقتصادی اور معاشی ترقی میں کلیدی کردار ادا کرتی ہیں ملک کے دیگر بڑے شہروں سے ٹرانسپورٹ یونین اور مالکان نے اوور لوڈنگ کے خاتمے کیلئے موٹروے پولیس کی طرف سے کئے گئے اقدامات کو سر اہاتے ہوئے بھر پور تعاون کی یقین دہانی کرائی ہے۔
