اسلام آباد(بیورو رپورٹ)پاکستان تحریک انصاف (پی ٹی آئی) کے مرکزی رہنما اور رکن قومی اسمبلی شیر افضل مروت نے کہا ہے کہ پاکستان میں جو کچھ ہو رہا ہے یہ سب جوبائیڈن کی پالیسی ہے،اگر جوبائیڈن ہار گیا تو یہ حکومت بھی چلی جائے گئی،میں نے آج وفاقی تحقیقاتی ادارے (ایف آئی اے)کو درخواست دی ہے کہ اگر مجھے کچھ ہوا تو ذمہ دار شہباز شریف اور مریم نواز ہوں گی۔
”پاکستان ٹائم“ مطابق ایف آئی اے دفتر کے باہر میڈیا سے گفتگو کرتے ہوئے شیر افضل مروت نے کہا کہ پاکستان میں جو کچھ ہو رہا ہے یہ سب جوبائیڈن کی پالیسی ہے،اگر جوبائیڈن ہار گیا تو یہ حکومت بھی چلی جائے گئی،اگر ٹرمپ جیت گیا تو خان کے واپس آنے کی امکانات بڑھ جائیں گے۔انہوں نے کہا کہ آج ایف آئی اے کے دفتر پیش ہوا ہوں،ایف آئی اے حکام نے سوالات کیے،تمام جوابات دے دیے،میں نے آج درخواست دی ہے کہ اگر مجھے کچھ ہوا تو ذمہ دار شہباز شریف اور مریم نواز ہوں گے،ایف آئی اے کو کہا ہے کہ اِس معاملے کی تحقیقات ہونی چاہیے۔شیر افضل مروت کا کہنا تھا کہ حد یہ ہے کہ میرے یہاں آنے سے پہلے ن لیگ والوں نے میرے خلاف درخواست دے دی کہ میرا یہ بتانا کہ میرے خلاف کرائے کے قاتلوں کی خدمات حاصل کرلی گئی ہیں،اس سے ان کی جان کو خطرہ ہو گیا ہے،یہ اتنے بڑے بدمعاش ہیں کہ ان کے خلاف آواز بھی نہ اٹھائی جائے،۔
شیر افضل مروت نے کہا کہ ایک شخص پاکستان سے فرار ہو کر 15 سال سے دبئی میں ہے،معلومات کے مطابق کچھ بھارتیوں نے وزیر اعلیٰ پنجاب مریم نواز کے کہنے پر رابطہ کیا،میرے پاس ویڈیو اور آڈیو میسجز اردو اور پشتو میں ہیں، تحقیقات ہونی چاہئیں،مجھے کچھ بھی ہوا تو اس کے ذمہ دار ن لیگ والے ہوں گے،شہباز شریف اور مریم کے خلاف مقدمہ کی درخواست ایف آئی اے کو دے دی ہے۔انہوں نے کہا کہ 8 فروری کو پورے ملک میں اس صدی کا سب سے بڑا انقلاب آیا جب بالخصوص پنجاب نے اسٹیبلشمنٹ کو مسترد کیا اور پی ٹی آئی کو دو تہائی اکثریت دی،انہوں نے ہمارا مینڈیٹ چوری کیا لیکن قوم نے 9 مئی اور تمام الزامات کو رد کر دیا۔
