لاہور(کورٹ رپورٹر)احتساب عدالت نے وزیراعظم شہبازشریف اور حمزہ شہباز کیخلاف رمضان شوگر مل ریفرنس واپس نیب کو بھجوانے کا تحریری حکم جاری کر دیا۔
احتساب عدالت نے وزیراعظم شہبازشریف اور ان کے صاحبزادے حمزہ شہباز کی حفاظتی ضمانت بھی منظور کر لی۔عدالتی حکم نامے میں کہا گیا کہ شہباز شریف اور حمزہ شہباز 5، 5 لاکھ کے ضمانتی مچلکے جمع کروا دیں۔عدالتی فیصلے میں کہا گیا کہ متعلقہ فورم میں کیس منتقل ہونے تک شہباز شریف اور حمزہ شہباز کو ضمانت دی جا رہی ہے۔ نیب آرڈیننس کی دفعہ 5 میں ترمیم کے بعد رمضان شوگر ملز ریفرنس احتساب عدالت کے دائرہ اختیارسے باہر ہے۔احتساب عدالے نے فیصلے میں یہ بھی کہا کہا چیئرمین نیب اس کیس کو متعلقہ فورم میں دائر کریں۔ نیب آرڈیننس کی دفعہ 5 میں 500 ملین سے کم رقم کی خورد برد کے معاملے پر کیسز کو دائرہ اختیار سے باہر قرار دیا گیا ہے۔
وزیراعظم شہباز شریف اور سابق وزیراعلی پنجاب حمزہ شہباز پر قومی خزانے سے تحصیل بھوانہ میں رمضان شوگر ملز کیلئے گندہ نالہ تعمیر کروانے کا الزام ہے۔ریفرنس میں شہباز شریف اور حمزہ شہباز پر 213 ملین روپے کا قومی خزانے کو نقصان پہنچانے کا بھی الزام ہے۔دوسری جانب رانا ثنااللہ کے خلاف منشیات کیس میں مزید بحث کے لیے کارروائی 15 اکتوبرتک ملتوی کر دی گئی۔
