اسلام آباد (نمائندہ خصوصی ) پاکستان تحریک انصاف کے رہنما شیرافضل مروت کے خلاف گھیراتنگ کرلیا گیا اور متنازعہ ٹوئیٹ پر انکوائری شروع ہوگئی ہے اور اس سلسلے میں رکن اسمبلی کو ایف آئی اے نے 18 مارچ کو طلب کرلیا۔ پاکستان ٹائم کے مطابق ایف آئی اے سائبر کرائم سیل اسلام آباد کی جانب سے شیر افضل مروت کو 18 مارچ کی صبح 10 بجے سائبر کرائم رپورٹنگ سینٹر جی 13 اسلام آباد میں پیش ہونے کے لیے کہا گیا ہے، نوٹس میں تحریر کیاگیا ہے کہ انکوائری بیرسٹر عقیل ملک کی درخواست پر شروع کی گئی ہے، جس کے مطابق آپ نے 9 مارچ کو اپنے ٹوئٹر ہینڈل کے ذریعے ٹوئٹ کیا ۔نوٹس میں شیر افضل مروت کو اپنا موبائل فون اور الیکٹرانک ڈیوائسزبھی ساتھ لانے کی ہدایات کی گئی ہیں ۔ نوٹس میں یہ بھی واضح کیاگیا ہے کہ عدم پیروی 174 پی پی سی کے تحت قابل سزا بھی ہے ۔ یاد رہے کہ شیر افضل مروت نے اسلام آباد میں پریس کانفرنس کا کلپ، جس میں وہ وزیر اعلی پنجاب پر اپنے خلاف مبینہ سازش کا الزام عائد کررہے ہیں، کا ٹویٹ کیا تھا اور خود بھی کہا تھا کہ وہ ایف آئی اے کو تمام ثبوت دینے کے لیے تیار ہیں۔
