ملک میں مہنگائی اور بیروزگاری عروج پر ہے، مریم اورنگزیب کو بھی الیکشن سے دو روز قبل پتہ چل گیا

لاہور(سٹاف رپورٹر) پاکستان مسلم لیگ(ن)کی رہنما اور سابق وفاقی وزیر اطلاعات مریم اورنگزیب نے بھی اعتراف کیا ہے کہ آج ملک میں مہنگائی اور بیروزگاری عروج پر ہے،یادرہے کہ نگران حکومت سے قبل مسلم لیگ ن ہی اتحادی حکومت تھی ۔ صوبائی دارلحکومت میں پریس کانفرنس سے گفتگو میں ان کا کہنا تھا کہ پاکستان کے عوام نے 4 سال نالائقی، نااہلی کا سامنا کیا،نوازشریف کے جانے کے بعد ملک میں نفرت پھیلائی گئی، 2013 میں نواز شریف نے برے حالات میں حکومت سنبھالی، 2017 میں ملک ترقی کی شاہراہ پر گامزن ہوگیا تھا اور نوازشریف کے دور میں ملک ترقی کررہا تھا، پھر شہبازشریف نے حکومت میں آکر ملک کو دیوالیہ ہونے سے بچایا، عوام جانتے ہیں، مسلم لیگ(ن)اور نواز شریف اپنا وعدہ پورا کرتے ہیں، منشور پر مکمل عمل کیا جائے گا۔ مریم اورنگزیب کاکہناتھاکہ پاکستان تحریک انصاف کی حکومت ملک میں انتشار پھیلا رہی تھی، ہم سے احتساب ہوا تو 9 مئی نہیں کیا۔ رہنما مسلم لیگ(ن)نے کہا کہ ہماری حکومت آئی تو مہنگائی کو کم کریں گے۔