سبی (وقائع نگار)سبی میں جناح روڈ پر پی ٹی آئی کی انتخابی ریلی کے قریب دھماکہ ہوا جس کے نتیجے میں 4افراد جاں بحق اور 7 زخمی ہو گئے ہیں۔
”پاکستان ٹائم “کے مطابق سبی میں انتخابات کے سلسلے میں پی ٹی آئی کی ریلی کا اہتمام کیا گیا اور اسی دوران دھماکہ ہو گیا جس سے افراتفری پھیل گئی۔ہسپتال ذرائع نے مریضوں کی تشویشناک حالت کے پیش نظر ہلاکتوں میں اضافے کا خدشہ ظاہر کیا ہے۔بم ڈسپوزل اسکاو¿ٹس کی جانب سے جائے وقوع سے شواہد اکٹھے کیے جا رہے ہیں۔دھماکے کے بعد پولیس اور قانون نافذ کرنے والے اداروں نے جائے حادثہ کو گھیرے میں لے لیا۔محکمہ صحت نے ایڈوائزری جاری کرتے ہوئے دارالحکومت کوئٹہ سمیت دیگر شہروں کے ہسپتالوں میں ایمرجنسی نافذ کردی ہے۔دوسری جانب نگران وزیر اطلاعات جان اچکزئی نے کہا کہ افسوسناک واقعے کے بعد سیکیورٹی ہائی الرٹ کردی گئی۔ان کا کہنا تھا کہ دھماکےکی نوعیت کامعلوم نہیں ہوسکا،سبی سمیت بلوچستان کے ہسپتالوں میں ایمرجنسی نافذ کردی گئی ہے۔علاوہ ازیں پی ٹی آئی نے سماجی رابطے کی ویب سائٹ ایکس پر ریلی میں ہونے والی دھماکے کی تصدیق کی۔الیکشن کمیشن نے سبی میں سیاسی جماعت کی ریلی میں دھماکے کا نوٹس لے لیا،چیف الیکشن کمشنر نے چیف سیکریٹری اور آئی جی بلوچستان سے واقعے کی رپورٹ طلب کرلی۔
