پشاور (سٹاف رپورٹر) عوامی نیشنل پارٹی کی ثمر بلور نےمسلم لیگ ن کے قائد نوازشریف سے معافی مانگنے کا مطالبہ کردیا، انہوں نے یہ مطالبہ نوازشریف کی طرف سے خیبر پختون خوا کے عوام کو بے وقوف کہے جانے پر کیا۔ پارٹی ترجمان ثمر بلورکاکہناتھاکہ تین بار وزیراعظم پاکستان کے عہدے پر رہنے والے شخص کو یہ زیب نہیں دیتا کہ ایک صوبے کے عوام کو بیوقوف کہے، یہ الفاظ ایسے وقت کہے گئے جب انکی دختر اسی صوبے میں انتخابی مہم چلارہی تھی، یہ لوگ کس منہ سے یہاں آکر ووٹ مانگیں گے؟ انہوں نے طنز کرتے ہوئے کہا کہ ہمیں معلوم ہے کہ پنجاب کا ڈومیسائل رکھنے والا ہر شخص اس ملک میں معزز سمجھا جاتا ہے لیکن پختونخوا کے عوام کے نمائندے ابھی موجود ہیں، ہم اس عمل کی نہ صرف مذمت کرتے ہیں بلکہ مطالبہ کرتے ہیں کہ نوازشریف صاحب اپنے الفاظ واپس لے کر پوری قوم سے معافی مانگیں۔
