راولپنڈی(سٹاف رپورٹر)جیل میں بند سابق وزیراعظم عمران خان نے کہا ہے کہ ہم کسی صورت میں بلاول بھٹو زرداری کی مدد نہیں کریں گے،ساری پارٹیز ایک ہو چکی ہیں پھر بھی پی ٹی آئی کو کنٹرول کرنا مشکل ہے، بات اس سے کرنی چاہیے جس کے پاس پاور بھی ہو ، میں پہلے دن سے کہہ رہا ہوں کہ صاف شفاف انتخابات کروائیں ، انجینئرنگ نے ملک کو بہت نقصان پہنچایا۔ توشہ خانہ کیس کی سماعت کے موقع پر کمرہ عدالت میں صحافیوں سے غیر رسمی گفتگو کرتے ہوئے عمران خان نے کہا کہ یہ اوپن ٹرائل نہیں ہے، میڈیا کے دوستوں کو پیچھے بٹھا دیا گیا،حالات اب یہ بن چکے ہیں کہ پی ٹی آئی کو کنٹرول کرنا ان کے لیے مشکل ہے، ضمنی الیکشن میں بھی اسٹیبلشمنٹ اور الیکشن کمیشن نے ان کی مدد کی تھی ،ہماری کارنر میٹنگ ہوتی ہے تو پولیس چھاپے مارنا شروع ہو جاتے ہیں ۔ ان کاکہناتھاکہ 9مئی کا الزام ہم پر لگایا گیا لیکن ہم نے تو کوئی قانون نہیں توڑا، جب مجھے گولیاں لگیں تب بھی کوئی احتجاج نہیں ہوا تھا ۔ایک سوال کے جواب میں انہوں نے بتایاکہ ہم کسی صورت بلاول بھٹو زرداری کی مدد نہیں کریں گے ، وہ مدد مانگ رہا ہے تو ان سے مانگے جن سے مل کر 16ماہ حکومت کی ،یہ آج ایک دوسرے کے مخالف ہو چکے ہیں لیکن یہ اندر سے ایک ہی ہیں۔
