اسلام آباد (سٹاف رپورٹر) سپریم کورٹ آف پاکستان کے ججز کے خلاف سوشل میڈیا پر گمراہ کن مہم کی تحقیقات کے لیے مشترکہ تحقیقات ٹیم (جے آئی ٹی) تشکیل دے دی گئی جس کا وزارت داخلہ نے نوٹیفکیشن بھی جاری کردیا۔ نوٹیفکیشن کے مطابق جے آئی ٹی کے سربراہ ایڈیشنل ڈائریکٹر وفاقی تحقیقاتی ادارے (ایف آئی اے) سائبر کرائم ونگ ہوں گے، نمائندوں میں آئی ایس آئی، آئی بی اور پی ٹی اے کے حکام بھی شامل ہیں جو سپریم کورٹ کے ججوں کیخلاف مذموم مہم چلانے والوں کا پتہ لگائیں گے اور مستقبل میں ایسے واقعات کی روک تھام کےلیے سفارشات دے گی۔ یہ جے آئی ٹی اپنی ابتدائی رپورٹ 4 ہفتے میں پیش کرے گی۔
