اسلام آباد (سٹاف رپورٹر) سابق وزیراعظم اورتحریک انصاف کے بانی عمران خان ان دنوں اڈیالہ جیل میں ہیں جہاں سائفر کیس کی سماعت کے موقع پر صحافیوں سے گفتگو کے دوران انہوں نے پیپلزپارٹی کے ساتھ ممکنہ اتحاد کا فیصلہ سنادیا۔ پاکستان ٹائم کے مطابق عمران خان نے کہا کہ پرسوں ایک امپائر نے نو بال دی ہے، لندن پلان کے تحت انہیں جیل میں ڈال کر پی ٹی آئی کو ختم کرنے کی کوشش کی گئی،نواز شریف ہمیشہ امپائرز کو ساتھ ملا کر کھیلتا ہے، نواز شریف، آصف علی زرداری اور مریم نواز نے توشہ خانہ سے بلٹ پروف گاڑیاں لیں، انہیں کوئی نہیں پوچھتا، نواز شریف کے کیس ختم کر دیے گئے، سائفر کیس کا اوپن ٹرائل کیا جائے تاکہ لوگوں کو حقائق کا پتہ چلے، یہ مجھے کہتے ہیں کہ سائفر کو سیکریٹ کیوں نہیں رکھا۔ ایک صحافی نےعمران خان سے سوال کیا کہ بلاول کے بیانات بظاہر مثبت ہیں، کیا پیپلز پارٹی کے ساتھ انتخابی اتحاد ممکن ہے، جس کے جواب میں عمران خان کاکہناتھاکہ’’ پیپلز پارٹی کے ساتھ کسی صورت اتحاد نہیں کریں گے‘‘۔
