لاہور (خصوصی رپورٹر)پاکستان مرکزی مسلم لیگ کے صدر خالد مسعود سندھو نے کہا ہے کہ جب تک ریاست کی جانب سے شہریوں کو تمام بنیادی حقوق نہیں دیے جائیں گے تب تک ریاست وقار کے ساتھ نہیں چل سکتی،مرکزی مسلم لیگ کا منشور ریاست کو وقار کے ساتھ چلانا اور قوم کی فلاح و بہبود کو یقینی بنانا ہے۔ مرکزی مسلم لیگ اپنی مدد آپ کے تحت عوام کے مسائل کے حل اور ریلیف فراہم کرنے کی کوشاں ہے۔ان خیالات کا اظہار انہوں نے این اے 124 میں انتخابی جلسہ اور مسلم لیگ کے افتتاح کے موقع پر شرکاء سے خطاب کرتے ہوئے کیا۔اس موقع پر چیئرمین علماء اتحاد موومنٹ قاری یعقوب شیخ،صدر لاہور ڈویژن چوہدری محمد سرور،امیدوار این اے 124 امین بیگ، امیدوار پی پی 163 ڈاکٹر محمد عمران، جنرل سیکرٹری تحصیل ماڈل ٹاؤن عمران لیاقت بھٹی، ثاقب جاوید عارفی، ڈاکٹر یوسف، اکرم رحمانی اور دیگر مقررین نے خطاب کیا۔ جلسے میں اہل علاقہ نے بھر پور شرکت کی، جلسے میں شرکاء کے لیے پرتکلف ناشتے کا اہتمام بھی کیا گیا۔اس موقع پر جلسے کے شرکاء سے خطاب کرتے ہوئے چوہدری سرور کا کہنا تھا کہ پاکستان مرکزی مسلم لیگ عوام کی حقیقی نمائندگی کرے گی، ہم خدمت کا منشور لے کر عوام میں آئے ہیں عوام فیصلہ کرے کے کہ انہوں نے صرف الیکشن کے دنوں میں نظر آنے والوں کا ساتھ دینا ہے یا پھر ہر وقت عوام میں رہنے والے اور خدمت کرنے والوں نمائندوں کو ووٹ دینا ہے۔ امیدوار برائے قومی اسمبلی حلقہ 124 آمین بیگ نے کہا کہ عوام چوروں اور لٹیروں کی پہچان کرے اور اپنے نمائندوں کو ملک سدھارنے کا موقع دیں۔ انہوں نے کہا ہم عوام میں سے ہیں اور ہمارے جینا مرنا قوم کے ساتھ ہے۔ حلقے میں کامیابی حاصل کرکے حقیقی قیادت کا نمونہ پیش کریں گے۔ ڈاکٹر عمران نے کہا کہ ہم اس حلقے کی عوام سے اپیل کرتے ہیں کہ اس الیکشن میں ہمارا ساتھ دیں اور آٹھ فروری کو کرسی پر مہر لگا کر پاکستان سے محبت اور وفاداری کا ثبوت دیں۔
