کوئٹہ ، اسلام آباد (سٹاف رپورٹر ) بلوچستان سے دھرنے کے لیے اسلام آباد پہنچنے والے مظاہرین میں شامل ماہ رنگ بلوچ کا سوشل میڈیا اکاونٹ بھارت سے چلائے جانے کا دعویٰ سامنے آگیا، یہ دعویٰ بلوچستان کے نگران وزیر اطلاعات جان اچکزئی نے کیا۔
میڈیا سے گفتگو کرتے ہوئے ان کاکہناتھاکہ بھارت پاکستان میں دہشت گردی کررہا ہے، بھارت کو ناکامی اور رسوائی کے سوا کچھ نہیں ملے گا، دشمن کے ناپاک عزائم کامیاب نہیں ہونے دیں گے، پاک فوج کے جوان ہماری سرحدوں کی حفاظت کر رہے ہیں، ریاست کو گالی دینے والوں سے کوئی رعایت نہیں برتی جاتی۔ انہوں نے کہاکہ پورا ملک بلوچستان کے لوگوں سے محبت کرتا ہے، ریاست نے قومی دھارے میں شامل ہونے والوں کو سینے سے لگایا، بھٹکے ہوئے لوگوں سے مذاکرات کے لیے تیار ہیں،پاکستان ایک جمہوری ملک ہے جہاں ہر کسی کو احتجاج کا حق حاصل ہے لیکن اسلام آباد میں ایک دہشت گرد کی بیٹی دہشت گردوں کے سہولت کاروں کے لیے احتجاج کر رہی ہے، مجھے شرم آتی ہے ان لوگوں پر جو ماہ رنگ بلوچ کے کیمپ میں جاتے ہیں اور شہدائے بلوچستان کے کیمپ میں نہیں جاتے۔
