اسلام آباد(محکمہ موسمیات) دھند میں اضافے کے باعث موٹروے ایم 1 متعدد مقامات پر ٹریفک کیلئے بند کردی گئی ہے۔ ترجمان موٹروے پولیس کے مطابق موٹروے ایم 1 پشاور سے اسلام آباد تک، سوات ایکسپریس وے کرنل شیرخان سے چکدرہ تک، ہزارہ ایکسپریس وے برہان سے جھاری کس تک جبکہ ایم 14 ہکلہ سے فتح جنگ تک شدید دھند کے باعث بند کردی گئی ہے۔ اسی طرح موٹروے ایم فور کو فیصل آباد سے گوجرہ اور عبدالحکیم سے شورکوٹ تک ہر قسم کی ٹریفک کیلئے بند کردیا گیا ہے جبکہ موٹر وے ایم 5 پر شدید دھند کی وجہ سے اوچ شریف انٹرچینج اور جھانگڑا انٹرچینج کو بھی بند کردیا گیا ہے۔ ترجمان موٹروے پولیس نے اپنے پیغام میں مزید کہا کہ موٹروے بند کرنے کا مقصد حادثات سے بچاو¿ اور موٹروے استعمال کرنے والوں کی جان و مال کی حفاظت ہے، شہریوں سے درخواست ہے کہ دھند کے اوقات میں غیرضروری سفر سے گریز کریں اور اپنا سفر دن کی روشنی میں مکمل کرنے کی کوشش کریں، گاڑیوں میں فوگ لائٹس کا استعمال کریں، تیز رفتاری سے پرہیز کریں اور اگلی گاڑی سے مناسب فاصلہ معمول سے زیادہ رکھیں۔
