لاہور( وقائع نگار خصوصی)صوبائی دارلحکومت سے قومی اسمبلی کے حلقے این اے 127سے پیپلز پارٹی کے چیئرمین بلاول بھٹو زرداری کے کاغذات نامزدگی پر اعتراض مسترد کردیاگیا اور اس سلسلے میں تحریری فیصلہ بھی جاری کردیاگیا۔ ریٹرننگ افسر کی طرف سے جاری ہونیوالے 4صفحات پر مشتمل تحریری فیصلے میں کہا گیا ہے کہ دو سیاسی جماعتوں سے وابستگی کے معاملے پر الیکشن کمیشن سے رجوع کیا جائے، شکایت کنندہ محمد ایاز این اے 127سے تعلق نہیں رکھتا،وہ نارووال کا رہائشی ہے، ان کے اعتراضات کو مسترد کیا جاتا ہے۔ واضح رہے کہ بلاول بھٹو کے کاغذات نامزدگی دو سیاسی جماعتوں سے وابستگی ہونے پر مسترد کرنے کی استدعا کی گئی تھی۔
