اسلام آ باد (سٹاف رپورٹر ) سابق وفاقی وزیر پرویز خٹک کے ’بلے ‘ سے متعلق نشان سے متعلق بیان پر تحریک انصاف کا ردعمل بھی آگیا اور اسے بلے کا نشان ہتھیانے کی سازش قرار دے دیا۔ تحریک انصاف کے ترجمان نے اپنے بیان میں کہا کہ اس سازش میں مرکزی کردارچیف الیکشن کمشنرہیں جوپوری تاریخ رکھتے ہیں، اعلامیے میں مزید کہا گیا ہے کہ تحریک انصاف کو جبر سے انتخابات سے باہر کرنے کی کوششیں کی جارہی ہیں، نشان ہتھیانے کی سازش کی جامع تحقیقات کیلئے عدالتی کمیشن قائم کیا جائے۔ ترجمان نے استدعا کی کہ بلے کے نشان پر الیکشن کمیشن کے متنازعہ ترین فیصلے کو کالعدم قرار دے کر ملک کی سب سے بڑی سیاسی جماعت کو بلے کا انتخابی نشان فراہم کیا جائے، جمہوریت اور دستور کے خلاف سازشوں کے کلیدی کردار چیف الیکشن کمشنر کے ملک و قوم کے خلاف سنگین جرائم کا حساب قوم ضرور لے گی۔
